პრეზიდენტი საპარლამენტო ფრაქციებს სასამართლო სისტემის ტრანსფორმაციასთან დაკავშირებით კონსულტაციებს სთავაზობს.
ამის შესახებ პრეზიდენტის საპარლამენტო მდივანმა ანა დოლიძემ დღეს გამართულ პრესკონფერენციაზე განაცხადა.
პრეზიდენტი ასევე საპარლამენტო ფრაქციებს რიგგარეშე სხდომის მოწვევის თარიღთან დაკავშირებით კონსულტაციებსაც სთავაზობს.
„საქართველოს პრეზიდენტს არაერთხელ განუცხადებია, რომ საქართველოს სასამართლო ხელისუფლებას სჭირდება ტრანსფორმაცია ანუ ძირეული მყისიერი და ფართომასშტაბიანი რეფორმა. ამჟამად იუსტიციის უმაღლეს საბჭოში მიმდინარეობს მოსამართლეთა შერჩევის კონკურსი, რომლის შედეგადაც უნდა დაინიშნოს დაახლოებით 65 მოსამართლე. სამოქალაქო საზოგადოების ნაწილში არსებობს მოსაზრება, რომ ეს კონკურსი ჩატარდა გაუმჭვირვალედ, დარღვევებით და მასში მონაწილეობდა რამდენიმე კანდიდატი, რომლის პროფესიული ბიოგრაფია კითხვის ნიშნებს აჩენს. შესაბამისად, არსებობს საშიშროება, რომ ამ კონკურსის შედეგად სასამართლო დაკომპლექტდეს მოსამართლის მანტიასთან შეუსაბამო კანდიდატებით. რაც, რა თქმა უნდა, კიდევ უფრო დაასუსტებს სასამართლოსადმი საზოგადოების ნდობას. ჩვენი აზრით, ამ მძიმე შედეგის თავიდან აცილება შესაძლებელია, თუკი პარლამენტი მესამე მოსმენით მიიღებს მართლმსაჯულების რეფორმის მესამე ტალღას“, – განაცხადა ანა დოლიძემ.
პრეზიდენტის საპარლამენტო მდივნის ინფორმაციით, კანონპროექტი, რომელიც მართლმსაჯულების მესამე ტალღის ფარგლებშია მომზადებული, 27 აპრილის შემდეგ, გაუგებარი მიზეზით გაჩერებულია.
„საქართველოს პრეზიდენტი მზადაა, სასამართლო სისტემის ტრანსფორმაციასთან დაკავშირებით, კონსულტაციები დაიწყოს პარლამენტში წარმოდგენილ ყველა პოლიტიკურ ფრაქციასთან, რომელსაც სასამართლო ხელისუფლების მომავალი აღელვებს. პრეზიდენტის დავალებით, ხვალიდანვე მზად ვარ ვაწარმოო კონსულტაციები“, – განაცხადა ანა დოლიძემ.
პრეზიდენტის საპარლამენტო მდივნის განმარტებით, ”თუკი მართლმსაჯულების რეფორმის მესამე ტალღა ამოქმედდება, გაჩნდება ძალიან ბევრი ბერკეტი, მათ შორის კანდიდატების მიერ გასაჩივრების ბერკეტი”.
„ამით ჩვენ შევძლებთ ნაწილობრივ მაინც ავიცილოთ თავიდან ის ძალიან მძიმე შედეგი, რაც სხვა შემთხვევაში დაგვიდგება“, – აღნიშნა ანა დოლიძემ.