იმერეთის რეგიონში მოსული უხვი ნალექის შედეგად მიყენებული ზარალის დათვლა დაიწყო. იმერეთში სახელმწიფო რწმუნებულის–გუბერნატორის ადმინისტრაცია მუშაობის საგანგებო რეჟიმზე გადავიდა.
ვანის მუნიციპალიტეტში უკვე შეიქმნა ზარალის დამთვლელი კომისია, გამგეობაში გამოყოფილია მობილური ჯგუფები, რომლებიც მუნიციპალიტეტის სოფელში სტიქიით გამოწვეულ ზარალს ითვლიან.
”მობილიზებულია სპეცტექნიკა. სტიქიის ზონაში ეტაპობრივად მიმდინარეობს გაწმენდითი სამუშაოები, თუმცა უამინდობის გამო ტექნიკის მუშაობა შეფერხებულია. ამინდის გამოდარებასთან ერთად, ხვალ დილიდანვე სტიქიის სალიკვიდაციო სამუშაოები ინტენსიურად გაგრძელდება”, – აცხადებენ ადმინისტრაციაში.
არსებული ინფორმაციით, სტიქიის სალიკვიდაციო სამუშაოები მიმდინარეობს ბაღდათის მუნიციპალიტეტშიც, სადაც გზების გაწმენდითი სამუშაოები ხორციელდება. ასევე, გამგეობაში შექმნილია სპეციალური ზარალის დამთვლელი კომისია. ბოლო მონაცემებით ზარალმა 800 ათასი ლარი შეადგინა.
მუნიციპალიტეტებში ზარალის ზუსტი ოდენობის დადგენის შემდეგ იმერეთის რეგიონის მასშტაბით არსებული მონაცემები რეგიონული განვითარებისა და ინფრასტრუქტურის სამინისტროს გადაეგზავნება, რათა დროულად მოხდეს მუნიციპალიტეტებში დაზიანებული ინფრასტრუქტურის აღდგენა.
ადგილობრივ ხელისუფლებასთან ერთად სტიქიით მიყენებული ზარალის აღწერაში ჩართულია სოფლის მეურნეობის სამინისტროს რეგიონული სამსახურები. რეგიონული განვითარებისა და ინფრასტრუქტურის სამინისტროში კი მობილიზებულია სპეციალური ტექნიკა, რომელიც საჭიროების შემთხვევაში მზად არის აღნიშნულ მუნიციპალიტეტებს დაეხმაროს.