შოთა რუსთაველის სახელობის თბილისის საერთაშორისო აეროპორტში განახლებული ასაფრენ-დასაფრენი ზოლი გაიხსნა. როგორც ღონისძიებაზე სიტყვით გამოსვლისას პირველმა ვიცე პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა განაცხადა, ეკონომიკისა და მგდრადი განვითარების სამინისტროს შპს ”საქართველოს აეროპორტების გაერთიანებას” და შპს ”ტავ ურბან საქართველოს” შორის 2015 წლის 28 მაისს გაფორმდა შოთა რუსთაველის სახელობის თბილისის საერთაშორისო აეროპორტის კონცესიის განახლებული ხელშეკრულება და მაშინ დადეს პირობა, რომ თბილისის საერთაშორისო აეროპორტს 2016 წლის ზაფხულისთვის განახლებული სააეროდრომო ინფრასტრუქტურა ექნებოდა.
”დაახლოებით სამი თვის წინ, როდესაც ასაფრენი ზოლის სამშენებლო სამუშაოებს ვათვალიერებდი, კიდევ ერთხელ დაგპირდით, რომ ივლისისთვის სამუშაოები დასრულდებოდა. მიუხედავად იმისა, რომ წელს იყო უპრეცედენტოდ წვიმიანი გაზაფხული, რამაც მნიშვნელოვნად შეაფერხა სამშენებლო სამუშაოები, ჩვენ მაინც შევძელით დანაპირების შესრულება”, – განაცხადა ქუმსიშვილმა.
”პირველ რიგში ეს არის პროექტის მასშტაბურობა. ბევრისთვის არ არის ცნობილი, მაგრამ ასაფრენი ზოლის რეაბილიტაციის პროცესში დაიგო 135.000 ტონა ასფალტი, რაც საკმარისი იქნებოდა დაახლოებით 150 კილომეტრი ჩვეულებრივი ასფალტის გზის დასაგებად. სამშენებლო სამუშაოების პროცესში პირდაპირ დასაქმებული იყო 200-ზე მეტი ადამიანი და მობილიზებული იყო 60-ზე მეტი ერთეული სამშენებლო ტექნიკა. ინფრასტრუქტურის რეაბილიტაციისა და სანავიგაციო სისტემების განახლებაში განხორციელდა 70 მილიონ ლარზე მეტი ინვესტიცია. აღსანიშნავია, რომ ტექნოლოგია და მეთოდოლოგია, რომელიც გამოყენებულ იყო ასაფრენი ზოლის მშენებლობის დროს, არის ზუსტად ის ტექნოლოგია, რომელიც გამოყენებულ იყო აბუდაბის ფორმულა 1-ის სარბოლო მოედნის მშენებლობისას”, – განაცხადა ქუმსიშვილმა.
როგორც მინისტრმა აღნიშნა, კომპანია „ბლექ სი გრუპმა“ ამ პროექტის განხორციელებისთვის დამატებით 7.200.000 აშშ დოლარის ღირებულების სამშენებლო ტექნიკა შეიძინა.
”მეორე, რაც მინდა პროექტთან დაკავშირებით აღვნიშნო, მისი უწყვეტობა და შეზღუდული ვადებია. ყოველდღიურად ასაფრენი ზოლი იკეტებოდა 10 საათის განმავლობაში და ამ პერიოდში პროექტის ყველა მონაწილე თავს არ ზოგავდა, რომ ზუსტად საღამოს 8 საათზე ზოლი გახსნილიყო და პირველი საჰაერო ხომალდი მიეღო. უპრეცედენტოა ის ფაქტიც, რომ ასაფრენი ზოლის რეაბილიტაცია დაახლოებით 12 კვირაში დასრულდა. აუცილებლად უნდა აღინიშნოს, რომ „ტავ ჯორჯიამ“ განსაკუთრებული ორგანიზებულობა, ეფექტურობა და პროფესიონალიზმი გამოიჩინა – ამ ურთულესი პროექტის განხორციელების პროცესში, მართალია, ფრენების განრიგი შეიცვალა, მაგრამ არც ერთი რეისი არ შეფერხებულა სამშენებლო პროცესის მიზეზით. ასევე ფასდაუდებელია საქაერონავიგაციის როლი პროექტის განხორციელების ფარგლებში. სწორედ მათი პროფესიონალიზმი იყო იმის საწინდარი, რომ წანაცვლებული ზღურბლის დროს და ასევე აეროპორტის გახსნის მომენტში უზრუნველყოფილი იყო ფრენების უსაფრთხოება”, – განაცხადა ქუმსიშვილმა და ყურადღება პროექტში ჩართული კომპანიების კოორდინაციაზე გაამახვილა.
მისივე თქმით, სწორედ ამ წარმოუდგენელი და უპრეცენდენტო პროექტის შედეგად, აეროპორტს აქვს სრულად განახლებული ასაფრენი ზოლი და ახალი II კატეგორიის სანავიგაციო შუქტექნიკა, ”რომელიც უზრუნველყოფს კიდევ უფრო მეტ უსაფრთხოებას და კომფორტს ავიაკომპანიებისა და მგზავრებისთვის”.
”ეს ყველაფერი ჯერ კიდევ არ არის დასასრული – აეროდრომის რეაბილიტაციის და განახლების პროცესი გრძელდება; კეთდება საჰაერო ხომალდების ახალი სადგომები; დაწყებულია ახალი ჩამოფრენის ტერმინალის მშენებლობა. ყველაფერი კეთდება იმისთვის, რომ თბილისის საერთაშორისო აეროპორტი მომზადებული შეხვდეს ახალ გამოწვევებს და ამავე დროს მზად იყოს მგზავრთნაკადის ყოველწლიური ზრდისთვის”, – განაცხადა ქუმსიშვილმა.
პირველმა ვიცე პრემიერმა მადლობა გადაუხადა მათ, ვინც პროექტის განხორციელებაში საკუთარი წვლილი შეიტანა, მათ შორისაა – ტავ ჯორჯია, საქაერონავიგაცია, საქართველოს აეროპორტების გაერთიანება, ტავ ქონსტრაქშენი, ბლექ სი გრუპი, სამოქალაქო ავიაციის სააგენტო, IATA Consulting, ADPI და ვირდგენის ჯგუფი, ასევე იტალიურ კომპანიას “ოჩემს“, რომელმაც მისი თქმით, უმოკლეს ვადებში შეძლო საქაერონავიგაციისთვის საჭირო შუქტექნიკური სისტემების მოწოდება” და ასევე უკრაინულ კომპანიას „SDL-მონტაჟს“ შემჭიდროებულ ვადებში შესრულებული სამონტაჟო სამუშაოებისთვის.
”მინდა, დიდი მადლობა გადავუხადო საქართველოს პრემიერ-მინისტრს, ბატონ გიორგი კვირიკაშვილს, სწორედ მისი ხელმძღვანელობით დაიწყო ის პროცესი, რომელმაც დღემდე მოგვიყვანა”, – განაცხადა ქუმსიშვილმა და კომპანიების წარმომადგენლებს მადლობის სიგელები გადასცა.
ღონისძიებას მინისტრთა კაბინეტის წევრები, კომპანიების წარმომადგენლები და სხვა მიწვეული სტუმრები დაესწრნენ.