”რესპუბლიკურ პარტიას” არ მოვიაზრებ არც პარტნიორად და არც მოწინააღმდეგედ. მე საერთოდ იმ ხედვების წინააღმდეგი ვარ, რომელიც გააჩნია ”რესპუბლიკურ პარტიას”, – ამის შესახებ ჟურნალისტებს პარტია ”თამაზ მეჭიაური-ერთიანი საქართველოსთვის” ლიდერმა თამაზ მეჭიაურმა განუცხადა.
რაც შეეხება გიგლა აგულაშვილის მხრიდან ”რესპუბლიკური პარტიის” დატოვებას, მეჭიაურის თქმით, აგულაშვილი სხვებისგან განსხვავებით იმსახურებს პარტიის წევრობას.
”რესპუბლიკურ პარტიას” არ მოვიაზრებ არც პარტნიორად და არც მოწინააღმდეგედ. მე საერთოდ იმ ხედვების წინააღმდეგი ვარ, რომელიც გააჩნია ”რესპუბლიკურ პარტიას”, მაგრამ გაცილებით მეტი პატივისცემით ვარ განმსჭვალული მათ მიმართ, რადგან ისინი ღიად ამბობენ რაც უნდათ განსხვავებით სხვა პარტიებისგან, რომლებიც ამბობენ, რომ ეროვნულ ინტერესებზე არიან ორიენტირებულები.
აქედან გამომდინარე, მიუხედავად ჩემი ნეგატიური დამოკიდებულებისა ”რესპუბლიკური პარტიის” მიმართ, გაცილებით სიმპატიურად გამოიყურებიან ”ქართულ ოცნებასა” და ”ნაციონალურ მოძრაობასთან” შედარებით. განსხვავებით პოლიტსაბჭოს ბევრი წევრისგან, რომელმაც 2012 წლის არჩევნებამდე საერთოდ არ იცოდა რას ვაკეთებდით, რისთვის ვიბრძოდით, გიგლა აგულაშვილი იბრძოდა მაინც და უფრო მეტი უფლება აქვს იყოს ”ქართულ ოცნებაში” ვიდრე იმ ხალხს, ვინც თბილი ქვეყნებიდან ჩამოიყვანეს”, – განაცხადა მეჭიაურმა.
რაც შეეხება ”ქართულ ოცნების” სიას, მეჭიაური ვარაუდობს, რომ სია იქნება ჭრელი.
”ქართული ოცნების“ სია იქნება ჭრელი. მე არამგონია სია ისეთი იყოს, მოსახლეობის აბსოლუტური მხარდაჭერა მოიპოვოს. სია არ იქნება ერთი კაცის მიერ შედგენილი, ზოგი ერთი კაცის მიერ იქნება ჩასმული, ზოგი – მეორის, ზოგი – ელჩის. არ გამოვრიცხავ, რომ ამ სიაში ბევრი ისეთი პიროვნება ვიხილოთ, ვინც არ გაკარებია „ოცნებას“ ვიდრე ხელისუფლებაში მოვიდოდა”, – განაცხადა მეჭიაურმა.
რაც შეეხება საარჩევნო პროგნოზს, დეპუტატის თქმით, თუ არჩევნები ჩატარდება სამართლიანად და ხალხი მივა არჩევნებზე, მაშინ ოპოზიციაში ვიხილავთ ”ქართულ ოცნებას” და ”ნაციონალურ მოძრაობას”, რომლებიც ე.წ. დასავლურ ძალებს წარმოადგენენ.
”მოსახლეობის განწყობა არის აშკარად ნატო-ს საწინააღმდეგო. ამისთვის, უნდა გამოვიდეს მოსახლეობა და მიიღოს არჩევნებში მონაწილეობა”, – განაცხადა მეჭიაურმა.