“ერთ-ერთი ვერსიით, ამერიკაში საქართველოს ელჩს ჯერ კიდევ მოქმედი მინისტრი მიხეილ ჯანელიძე ჩაანაცვლებს, ჯანელიძის შემცვლელად კი გამოცდილი დიპლომატი თედო ჯაფარიძე მოიაზრება – როგორც ამბობენ, სწორედ ამ კონფიგურაციით შეეცდება მთავრობა იმ სკანდალის განეიტრალებას, რაც არჩილ გეგეშიძის განცხადებას მოჰყვა. არიან თუ არა ხელისუფლებაში პრორუსული ძალები და რატომ დაემთხვა ქართველი დიპლომატის ორაზროვანი განცხადებები საქართველოში აშშ-ის სახელმწიფო მდივნის ვიზიტს, კვიპროსის რესპუბლიკაში საქართველოს საელჩოს საქმეთა ყოფილი რწმუნებული გია ჯაფარიძე საუბრობს”, – წერს გაზეთი “კვირის პალიტრა” სტატიაში სათაურით “აშშ-ში საქართველოს ელჩი ასე არ უნდა ლაპარაკობდეს”.
“თუ გავრცელებული ინფორმაცია დადასტურდა და მიხეილ ჯანელიძე ამერიკაში საქართველოს ელჩად დაინიშნა, ეს ორმხრივი ურთიერთობისთვის დადებითი გზავნილია. მინისტრის ელჩად გაგზავნა ყოველთვის განსაკუთრებულ დამოკიდებულებაზე მიანიშნებს. თედო ჯაფარიძის საგარეო საქმეთა მინისტრად დანიშვნასაც მივესალმები – მას, როგორც პროფესიონალს, პატივს ვცემ, თუმცა, ამ ცვლილებებით, ყოველ შემთხვევაში არჩევნებამდე, არსებითად არაფერი შეიცვლება საქართველოს საგარეო კურსი დასავლეთის მიმართულებით გაგრძელდება. მოგეხსენებათ, არჩილ გეგეშიძე სამინისტროშიც დაიბარეს. ალბათ, განცხადების სიმძიმე აწონ-დაწონეს და შესაბამისი ზომებიც მიიღეს. ყოველ შემთხვევაში, ეს პოსტი დიდხანს თავისუფალი არ შეიძლება იყოს”, – აცხადებს გამოცემის კორესპონდენტთან საუბრისას გია ჯაფარიძე.
“გეგეშიძემ ცალსახად წარუმატებელი განცხადება გააკეთა. აშშ-ში საქართველოს ელჩი ასე არ უნდა ლაპარაკობდეს. შესაძლო რუსულ გავლენებზე საუბართან ერთად, მისი ინტერვიუ რასისტულ კონტექსტსაც შეიცავდა და ისიც ნათლად გამოიკვეთა, რომ საქართველოს ისტორიას არასწორად აანალიზებს. თუ ელჩი ასეთ შეცდომებს უნებლიეთ უშვებს, ვინ გვაძლევს გარანტიას, რომ ერთ დღესაც, როდესაც, შესაძლოა, მსხვილი ამერიკული გამოცემა მასთან ინტერვიუს ჩაწერით დაინტერესდეს, იმავე შინაარსის გაუგებარ განცხადებებს არ გააკეთებს?! თუმცა, არც ის მიმაჩნია სამართლიანად, დღეს ჯოხი მხოლოდ გეგეშიძეზე გადავტეხოთ. გავიხსენოთ, ვინ დანიშნა ის აშშ-ში ელჩად ოთხი წლის წინ – არჩილ გეგეშიძე მინისტრმა მაია ფანჯიკიძემ და იმ ჯგუფმა დანიშნა, ვინც მაშინ უწყებას კურირებდა. სწორედ ამ პერიოდში ელჩებს პირადი მეგობრობისა და ძმაკაცობის საფუძველზე ნიშნავდნენ და არა პროფესიული გამოცდილებით, გეგეშიძე გამონაკლისი არ ყოფილა. 30 ელჩი თავიანთი მეგობრებით ჩაანაცვლეს. ისიც კი მახსოვს, არჩილ გეგეშიძის აშშ-ში ელჩად გაგზავნას საქართველოში საზოგადოების ნაწილი ეწინააღმდეგებოდა, მაგრამ ამ პარტიის ძმაკაცობამ მაინც გაჭრა. გეგეშიძე საგარეო მიმართულებაზე ჯერ კიდევ შევარდნაძის დროს მუშაობდა, მას ამ სფეროში ყველა იცნობს, თუმცა ელჩის გამოცდილება არ ჰქონდა“, – განაგრძობს რესპონდენტი.
“ამერიკაში, ჩვენგან განსხვავებით, საკუთარ საგარეო ურთიერთობებს სერიოზულად ეკიდებიან. ვფიქრობ, ამერიკის პრეზიდენტის ადმინისტრაციაშიც ყველა ხვდება, ელჩმა რა შეცდომა დაუშვა. ბუნებრივია, არ ვფიქრობ, რომ ინტერვიუ კერის ვიზიტის პარალელურად შემთხვევით გამოქვეყნდა. სხვათა შორის, დაახლოებით ათი დღის წინ ამერიკაში ოფიციალური ვიზიტით ვიმყოფებოდი და ნამდვილად არ დამრჩენია შთაბეჭდილება, რომ საქართველოში პრორუსული ხელისუფლების ყოფნა ეეჭვებათ. პირიქით, ამ მხრივ კითხვები არ არსებობს… თუ გეგეშიძეს მსგავსი ინფორმაციის გაჟღერების სურვილი ჰქონდა, შეეძლო ოდნავ მოეცადა და პოზიცია აშშ-ის სახელმწიფო მდივნის საქართველოში ვიზიტის დასრულების შემდეგ დაეფიქსირებინა”, – ამბობს გია ჯაფარიძე და შეკითხვას – “ბრძანეთ, რომ 30 ელჩი თავის დროზე მეგობრობის ნიშნით დაინიშნა. გეგეშიძის განცხადების შემდეგ აუცილებელია თუ არა მათი კომპეტენციაც გადაიხედოს?” – პასუხობს:
“სახელმწიფოები ელჩებს ასე მარტივად არ უნდა ცვლიდნენ. უმჯობესი იქნება, დაველოდოთ მათი უფლებამოსილების ვადის ამოწურვას და როტაციის წესით ვიხელმძღვანელოთ”.