თბილისის საკრებულოს დეპუტატი ვახტანგ შაქარიშვილი სოციალურ ქსელში შემდეგი სახის პოსტსა და ვიდეოს ავრცელებს:
„საქართველომ 9 წელი მოდელირებულ რეალობაში იცხოვრა. მესმის, რომ ამას ძლიერი ინერცია აქვს და დღემდე მოყვება ჩვენ საზოგადოებას, მაგრამ მხოლოდ უსაზღვრო ცინიზმია და მეტი არაფერი, როცა კრემლში დაბადებული კაცი, რუსეთის საგარეო საქმეთა სამინისტროს მაღალჩინოსანი პროდასავლურ პოლიტიკოსად მიეწოდება საზოგადოებას, ხოლო პარალელურად მიმდინარეობს აღვირახსნილი შეტევა ადამიანზე, რომელსაც 36 წლის ასაკამდე, „პერესტროიკის“ დაწყებამდე რუსეთის ხელისუფლება ამავე ქვეყანაში არ უშვებდა (მის წარმოშობას და წინაპრებს აღარ შევეხები, ეს მაინც ვიცით იმედია) და გაერთიანებული ძალებით ცდილობენ მის დაკავშირებას რუსეთთან.
თანაც მნიშვნელოვანია ვინ აკეთებს ამას, ის ადამიანები ვინც თბილისში კონცერტს მართავდა, მაშინ როცა მღვდლებს და მონაზვნებს ჩვენი გმირი მეომრების მიტოვებული ცხედრები გამოჰქონდა ბრძოლის ველიდან.
ის ხალხი, ვინც ჩვენი ქვეყნის მხარდასაჭერად ჩამოსული საფრანგეთის საგარეო საქმეთა მინისტრს უკიდურესი სიმხდალე ანახა და მის თვალწინ ვერტმფრენის ხმის გაგონებაზე მოკურცხლა.
ის ადამიანები, რომლებიც ხელკეტებით არბევდნენ ომის ვეტერანებს.
ის ხალხი, რომლებიც ოკუპირებული ტერიტორიებიდან დევნილებს სახლებიდან საწოლებს უყრიდნენ და სატვირთო მანქანებით გადაყავდათ გრანტით აშენებულ საერთო საცხოვრებლებში.
ამას აკეთებენ ის ადამიანები, რომელთა ხელისუფლების პირობებში ათეულობით სტრატეგიული ობიექტი რუსეთის ხელში აღმოჩნდა.
ის ადამინები, ვინც ომის დასრულებიდან რამდენიმე დღეში, რუსეთში კონცერტის ჩატარებას იხვეწებოდა.
ამაზე ლაპარაკობენ ის ადამიანები, ვინც პოლკოვნიკი სერგო თეთრაძე წამებით მოკლა და ის ადამიანები ვინც ამას დღემდე აპრავებენ.
ამას აკეთებს ის პოლიტიკური ძალა, რომელიც ამბობდა რომ „რუსულ ფულს სუნი არ აქვს“.
ამას აკეთებს ნიკა მელია, რომელიც КГБ-ს სკოლის წარჩინებული კურსდამთავრებულია.
მხოლოდ დოკუმენტური კადრები, მხოლოდ ფაქტები“, – წერს შაქარიშვილი.