ზუგდიდის ყოფილი ვიცემერი გია გულორდავა სახელმწიფო უსაფრთხოების სამსახურში გამოკითხვაზეა. როგორც გულორდავამ თქვა, რუსეთში მყოფი ბიზნესმენისგან არანაირი თანხა მიუღია.
ყოფილი ვიცემერი “ქრონიკასთან” ინტერვიუში ამბობს, რომ თავს უდანაშაულოდ მიიჩნევს. გია გულორდავა აცხადებს, რომ ბიზნესმენს იცნობს, თუმცა ბრალდებებს არ აღიარებს და თანხის აღების ფაქტს უარყოფს. მისივე მტკიცებით, ზურაბ კვირკვიას სურდა იმ მეთოდებით მოეგვარებინა საქმე, როგორც რუსეთში აგვარებს, თუმცა ეს არ გამოუვიდა.
გულორდავამ თანამდებობა პირადი განცხადების საფუძველზე დატოვა. სუსის ინფორმაციით, ზუგდიდის ყოფილი მერის ლაშა გოგიას მონაწილეობით, სავარაუდო კორუფციულ გარიგებასთან დაკავშირებით გამოძიება მიმდინარეობს.
სკანდალური აუდიოჩანაწერი, რომელშიც ბიზნემენი ზურაბ კვირკვია ზუგდიდის უკვე ყოფილ მერს, ლაშა გოგიას ესაუბრება, გუშინ გავრცელდა. ჩანაწერში, ბიზნესმენი გოგიას ახსენებს, როგორ გადასცა გარიგების სანაცვლოდ მის მოადგილეს, გია გულორდავას 10 ათასი დოლარი კონვერტით. ასევე დამატებით როგორ ჩარიცხა კონკრეტულ საბანკო ანგარიშზე 30 ათასი ლარი.
ზუგდიდის მერმა ლაშა გოგიამ თანამდებობა 12 სექტემბერს დატოვა. ამის შესახებ მან თავის Facebook-ზე დაწერა.