საქართველოს პარლამენტის თავმჯდომარის ირაკლი კობახიძის განცხადებით, უმრავლესობის გადაწყვეტილებით, 2019 წლის 1 იანვარს პარლამენტი ქუთაისიდან თბილისში გადმოვა. კობახიძის ინფორმაციით, შესაძლოა, ქუთაისში, პარლამენტის შენობაში შსს-ს აკადემიის გადატანა მოხდეს.
„დეპუტატების აბსოლუტური უმრავლესობა მხარს უჭერდა პარლამენტის თბილისში გადმოტანას და საბოლოო ჯამში, ეს გახდა გადაწყვეტილების მიღების მიზეზი. არგუმენტი არის მრავალი, მათ შორის ისიც, რომ პარლამენტის ინსტიტუციურ გაძლიერებას ნამდვილად წაადგება მისი ერთ შენობაში არსებობა. სასახლე არ არის მხოლოდ სამუშაო ადგილი, ეს არის მისი ერთ-ერთი სიმბოლო. შესაბამისად, პარლამენტის იდენტობის გაძლიერებისთვის მნიშვნელოვანია, რომ მას ჰქონდეს ერთი სასახლე და დაფუძნებული იყოს დედაქალაქში. ჩვენ თავიდანვე გვქონდა საუბარი, საქმე ეხებოდა მხოლოდ ვადებს და საბოლოო ჯამში, უმრავლესობის გადაწყვეტილებით შევჯერდით იმაზე, რომ პარლამენტი 2019 წლის 1 იანვრიდან თბილისში გადმოვა. ჩვენ ვაძლიერებთ პარლამენტის საზედამხედველო ფუნქციებს, რაც იმას ნიშნავს, რომ ყოველდღიური ინტერაქცია უნდა იყოს პარლამენტსა და მთავრობას შორის. ეს შეუძლებელია იმ პირობებში, როდესაც მთავრობა ერთ ქალაქშია და პარლამენტი – მეორეში“, – განაცხადა კობახიძემ.
მისივე თქმით, რაც შეეხება შენობის ფუნქციას, შსს-ს მხრიდან გამოითქვა სურვილი, რომ მან უზრუნველყოს ამ შენობისთვის ახალი ფუნქციის მინიჭება.
„საუბარია შსს-ს აკადემიის გადატანაზე და შესაძლოა, შინაგან საქმეთა სამინისტროსთვის ეს შენობა ერთგვარი რეგიონული ჰაბი გახდეს”, – განაცხადა პარლამენტის თავმჯდომარემ.
ხარჯების დაზოგვასთან დაკავშირებით, ირაკლი კობახიძემ აღნიშნა, რომ ორი შენობის არსებობიდან გამომდინარე ზედმეტად იხარჯებოდა 2,5 მილიონი ლარი.
„დაიზოგება ყველა ხარჯი, რომელიც იყო ზედმეტი ორი შენობის არსებობიდან გამომდინარე. ეს იყო დაახლოებით 2,5 მილიონი, რაც ზედმეტად სჭირდებოდა ორი შენობის შენახვას. მთავარია, რომ შენობა ფუნქციურად სწორად იყოს დატვირთული“, – განაცხადა კობახიძემ.