ამერიკის შეერთებული შტატების პრეზიდენტის ქალიშვილმა ივანკა ტრამპმა უარყო ინფორმაცია იმის შესახებ, რომ მისი კანდიდატურა გაერო-ში აშშ-ს მუდმივი წარმომადგენლის თანამდებობაზე განიხილება.
„ჩემთვის დიდი პატივია, თეთრ სახლში შესანიშნავ კოლეგებთან ერთად მუშაობა და მე ვიცი, რომ პრეზიდენტი ნიკი ჰეილის თანამდებობაზე შესანიშნავ შემცვლელს წარადგენს. ეს მე არ ვიქნები“, – დაწერა ივანკა ტრამპმა „ტვიტერის“ საკუთარ გვერდზე.
მანამდე, აშშ-ს პრეზიდენტმა დონალდ ტრამპმა განაცხადა, რომ არ ჰგონია, ამ თანამდებობისთვის მსოფლიოში ივანკაზე უფრო კომპეტენტური კანდიდატი მოიძებნოს, თუმცა მას ამის გამო ნეპოტიზმში დაადანაშაულებენ.
შეგახსენებთ, რომ გაერო-ში აშშ-ს მუდმივი წარმომადგენლის თანამდებობიდან წასვლის შესახებ ნიკი ჰეილიმ გუშინ განაცხადა. ის პოსტს 2019 წლის იანვარში დატოვებს.