ქობულეთში მცხოვრები 150-მდე ადამიანი ბათუმის იუსტიციის სახლთან აქციას მართავს. მოსახლეობა ერთ-ერთ სტომატოლოგიურ კლინიკას მოტყუებაში ადანაშაულებს. მოქალაქეები ირწმენებიან, რომ ბათუმში კომახიძის ქუჩაზე მდებარე ზაზა ღოღობერიძის სტომატოლოგიურმა კლინიკამ მათ უფასო მომსახურება შესთავაზა, კბილები ამოუღო, ზოგოერთს უმკურნალა კიდეც, გაუქლიბა და მომსახურება შეწყვიტა.
“კბილები დამიხეხეს, ვეღარ ვლაპარაკობ და უცებ შეწყვიტეს მომსახურება“- აცხადებს ერთ-ერთი პაციენტი ვაჟა გაბაიძე.
მოქალაქეების მტკიცებით კლინიკის მენეჯერები მათ ეუბნებოდნენ, რომ მომსახურება უფასო იყო და მათი მკურნალობა დაზღვევის ფარგლებში ხდებოდა. სინამდვილეში კი, მოქალაქეების თქმით, კლინიკამ თითოეულ პაციენტთან „თიბისი ბანკში“ განვადების ხელშეკრულება გააფორმა, მოქალაქეებს ხელი მოაწერინა, საბანკო პროცედურების დასრულებისა და ფულის მიღების შემდეგ მომსახურებაც შეწყვიტა.
„ხელშეკრულებაზე მოტყუებით მოგვაწერინეს ხელი 3-დან 6 ათას ლარამდე გვაქვს აღებული განვადება, ბანკი გვთხოვს თანხას. კბილები კი ძველია აღარ გვაქვს, ეს კლინიკა ფაროსანაა“, -ამბობს დაზარალებული გურამ მიქელაძე.
საქმეზე გამოძიება უკვე დაიწყო. თუმცა ადვოკატის თქმით, კლინიკა ფუნქციონირებას მაინც განაგრძობს.
“კლინიკა კი ისევ მუშაობს. სხვა სახის საგამოძიებო პროცესს ადგილი არ ჰქონია. ჩემი დაცვის ქვეშ მყოფები ამბობენ, რომ კლინიკას მფარველი ჰყავს აჭარის უმაღლეს საბჭოში”,- აცხადებს ადვოკატი ირმა ზოიძე.
მოსახლეობა ამბობს, რომ ზაზა ღოღობერიძის და ლანა ღოღობერიძე მაღალჩინოსანია ამიტომ ჭიანურდება გამოძიება.