პარლამენტის წევრი ვიქტორ ჯაფარიძე მირზა სუბელიანთან შეხვედრის დეტალებზე დამატებით განმარტებებს ტელეკომპანია “პირველის” ეთერში აკეთებს.
“ვადასტურებ რომ იყო შეხვედრა. ორჯერ თუ სამჯერ ვიყავი შესული, მირზა სუბელიანის და მისი ოჯახის დაჟინებული თხოვნით. მე რომ მივედი, შემდეგ მოვიდა დათო ცუხიშვილი. მე ვიყავი ოფიციალურად შესული, კანონიერად, როგორც პარლამენტის წევრი. იმ შეხვედრიდან მრჩება შთაბეჭდილება, რომ მირზა სუბელიანი დიდი სტრესის ქვეშ არის, აქვს ჯანმრთელობის სერიოზული პრობლემები. ძალიან განიცდის ორი ახალგაზრდას დაღუპვას, მისი ცხოვრების ბედს. შევატყვე, რომ ის მთლად დალაგებული არ საუბრობდა. ისეთ რაღაცებს საუბრობდა, რომ სერიოზულად არ ჩამითვლია. ვუთხარი კიდეც, მარტო რატომ ხარ საკანში, ვინმესთან ერთად მაინც იყავი, დარდი რომ გაუზიარო-მეთქი. ჭკუაარეულმა კაცმა რა ილაპარაკა, ეს ნაკლებად საინტერესოა, ჩანაწერები როგორ გაკეთდა, ეს უფრო საინტერესო უნდა იყოს. ყველას ხომ ერთნაირი ნერვები არ აქვს? სამარტოო საკანში ზის. არ ვთვლი მის საუბარს სერიოზულად. ეს არის საკანში გამომწყვდეული კაცის ნააზრევი. იმდენად არასერიოზული იყო მისი საუბარი, რომ არც ვუსმენდი და ავთენტურობა დასადგენია ამიტომ… მეტი სათქმელი არაფერი მაქვს. გამოძიებასთან ვითანამშრომლებ, კანონმორჩილი ადამიანი ვარ.
სამწუხარო ის არის, ვინ ჩაწერა და რისთვის იყენებენ. ეს ხომ არჩევნებისთვის დადგმული სპექტაკლია?! ვისი ხელწერაც არის, ძალიან კარგად იცით”, – განაცხადა ვიქტორ ჯაფარიძემ, რომლის ინფორმაციითვე, ის სუბელიანთან საპატიმროში სამჯერ შევიდა.