ბექა მჭედლიშვილი სოციალურ ქსელში თაკო ჩარკვიანის მიერ გაკეთებულ განცხადებებს ეხმაურება და ფეისბუქის საკუთარ გვერდზე, სკანდალურ ინფორმაციას აქვეყნებს:
“თაკო ჩარკვიანს უთქვამს, მამუკა ჩარკვიანს ბიზნესი არ დაუბრუნეს და ამიტომ ჩათვალეთ, ჩვენ გავუკეთეთ ოპერაცია და არა სხვა ვინმემო. მე არ ვიცი თაკო ჩარკვიანს ვინ რა უთხრა ახლა, მაგრამ არც ის ვიცი, რატომ ლაპარაკობს ასე უნამუსოდ ეს ადამიანი. მახსოვს, 2015 წელს ბატონმა ჯანსუღ ჩარკვიანმა დარეკა პრემიერის აპარატში და გვითხრა რომ ურთულესი მდგომარეობა ქონდა მამუკა ჩარკვიანს და გვთხოვა ოპერაციის დაფინანსებაში დახმარება. ჩვენ ვუთხარით იმ დროინდელ პრემიერს, ირაკლი ღარიბაშვილს და მაშინვე იქნა გადაწყვეტილება მიღებული რომ მამუკა ჩარკვიანის ოპერაცია დაფინანსებულიყო. ძალიან გაგვიხარდა მაშინ ყველას და ძალიან ვგულშემატკივრობდით ბატონ მამუკას. ახლაც ძალიან მახარებს ეგ ამბავი და ისიც რომ ბატონი მამუკა კარგადაა. თაკო ჩარკვიანს კი გადაეცით რომ თანამდებობის მიღების სურვილით ყველაფერს ხაზი არ უნდა გადაუსვას და არც მისი გარდაცვლილი მამის და არც ყველასათვის საყვარელი მომღერლის, მამუკა ჩარკვიანის სახელით, უნამუსობა არ უნდა ილაპარაკოს.
ჟურნალ „სარკესთვის” მიცემულ ინტერვიუში პოეტმა ჯანსუღ ჩარკვიანმა მუსიკოს მამუკა ჩარკვიანისთვის გაკეთებული ურთულესი ოპერაციის შესახებ ისაუბრა, რომელიც პრემიერ-მინისტრ ირაკლი ღარიბაშვილის დახმარებით ჩატარდა. განცხადებას „ასავალ-დასავალი” რუბრიკაში „კვირგვინოსნები” აქვეყნებს.
„მამუკას ფეხზე ორი ოპერაცია გაუკეთდა. ძვალი თავიდან ბოლომდე დაშლის პირას იყო. საოცარი ოპერაცია ჩატარდა. ოპერაციის შემდეგ თქვეს, რაც მთავარია, იმას მივაღწიეთ, რომ ფეხი შევინარჩუნეთო.
მივაგენით ადამიანებს, რომლებმაც პრემიერ-მინისტრ ირაკლი ღარიბაშვილთან დაგვაკავშირეს. ვერასოდეს დავივიწყებ, მაშინ რაც მოხდა. ბატონი ირაკლი დიდი სიყვარულით მესაუბრა და მითხრა – ჯანსუღ, მითხარით, რამდენია საჭირო და დღესვე ჩავრიცხავთო. რომ არა ირაკლი ღარიბაშვილი, საქმე ძალიან ცუდად იქნებოდა.
მამუკა ჯერჯერობით გადარჩენის პირასაა, მაგრამ მინდა, ვთქვა, რომ მამუკა ჩარკვიანს სიცოცხლე შეუნარჩუნეს! ვენაცვალე ასეთ საქართველოს და ასეთ ქართველებს! ასევე ავსტრიას და იმ ბრწყინვალე ადამიანებს, რომლებმაც მამუკას ოპერაცია გაუკეთეს”, -აცხადებს ჯანსუღ ჩარკვიანი