აბაშის მუნიციპალიტეტის მერი, ლევან მაკალათია, აბაშა-მარტვილის მაჟორიტარ დეპუტატთან, ოთარ დანელიასთან, გუბერნატორის მოადგილესთან ირაკლი ჯიქიასთან, მუნიციპალურ ორგანოებთან ურთიერთობისა და რეგიონში განსახილველი პროექტების დეპარტამენტის უფროსთან, ირაკლი თოფურიასთან, საკრებულოს თავმჯდომარესთან, მამუკა კვიტაშვილთან და სხვა ოფიციალურ პირებთან ერთად სტიქიისაგან შექმნილ ვითარებას ადგილზე გაეცნო და დაზარალებულ ოჯახებს სახურავი მასალა, აზბესტ-ცემენტისა და გოფრირებული თუნუქის ფილები გადასცა.
მუნიციპალიტეტის ინფორმაციით, 30 ნოემბერს ძლიერმა ქარმა მნიშვნელოვნად დააზარალა მოსახლეობა, დაზიანდა საცხოვრებელ სახლებისა და ადმინისტრაციული შენობების სახურავები. ქარისაგან მოგლეჯილმა ხეებმა ჩახერგა შიდასამიმოსვლო გზები, დაწყდა ელსადენები, რის გამოც ელექტროენერგიის მიწოდება შეეზღუდა მუნიციპალიტეტის თითქმის ყველა ადმინისტრაციულ ერთეულს.
„სტიქიის ზონაში თავიდანვე იმყოფებოდნენ მერიის სამსახურების თანამშრომლებისაგან შემდგარი მობილური ჯგუფები, საგანგებო სიტუაციების სამსახურის თანამშრომლები. მობილიზებული იყო და საგანგებო რეჟიმში მუშაობდა ყველა შესაბამისი უწყება. ამ დროისათვის „ენერგო- პრო ჯორჯიას“ ტექნიკური ჯგუფების ოპერატიული ჩარევის შედეგად, მუნიციპალიტეტის მთელ ტერიტორიაზე სრულად აღდგენილია ელექტროენერგიის მიწოდება. ხეებისაგან გაიწმინდა გზები. ზარალის დამთვლელი სპეციალური კომისია ადგილზე სწავლობს არსებულ ვითარებას და ითვლიან ძლიერი ქარისაგან მიყენებულ ზარალს. სალიკვიდაციო სამუშაოები უახლოეს დღეებში დაიწყება, დაზარალებულებს დახმარება და თანადგომა სჭირდებათ, ჩვენ მათ გვერდით ვარ,“ – განაცხადა ლევან მაკალათიამ.