„გიორგი მარგველაშვილს უფლებამოსილების ვადა ეწურება და ბოლო დღეებში ცდილობს, რაღაცნაირად თავისი შეხედულებით, „კუდი მოიქნიოს“, – ამის შესახებ პარლამენტის თავმჯდომარემ ირაკლი კობახიძემ პრეზიდენტ გიორგი მარგველაშვილის განცხადებასთან დაკავშირებით აღნიშნა.
„მე არ ვიცი, პორტირებულში რა იგულისხმება. თუ საუბარია „ნაციონალურ მოძრაობასთან“ კავშირზე, ასეთი ადამიანებით სავსეა პრეზიდენტის ადმინისტრაცია. რას გულისხმობს პრეზიდენტი, არ ვიცი. კიდევ ერთხელ გავიმეორებ, მას ეწურება უფლებამოსილების ვადა და ამის ამოწურვის ბოლო დღეებში ცდილობს, რაღაცნაირად თავისი შეხედულებით, „კუდი მოიქნიოს“. ეს არ არის ღირსეული საქციელი“, – განაცხადა ირაკლი კობახიძემ.
„ვხედავთ, რომ არიან „ქართულ ოცნებაში“ პორტირებული „ნაციონალები“, არიან ექსპორტირებული „ნაციონალები“ – „ევროპული საქართველო“ და ჭეშმარიტი „ნაციონალები“, რომლებიც არიან „ნაციონალურ მოძრაობაში”, – ამის შესახებ საქართველოს მოქმედმა პრეზიდენტმა გიორგი მარგველაშვილმა კავკასიის უნივერსიტეტის მედიის სკოლის სტუდენტებთან შეხვედრაზე განაცხადა. მარგველაშვილის შეფასებით, „ეს პორტირებულები უყვებიან ექსპორტირებულებს, „ჭეშმარიტებმა“ რა დააშავეს და ამას ვუყურებთ, როგორც პოლიტიკურ დებატებს“.