საქართველოს პრეზიდენტი გიორგი მარგველაშვილი უახლოეს მომავალში საკონსტიტუციო სასამართლოს თავმჯდომარეს გიორგი პაპუაშვილს შეხვდება. ამის შესახებ პრეზიდენტის საპარლამენტო მდივანმა ანა დოლიძემ დღეს გამართულ ბრიფინგზე განაცხადა.
მისივე თქმით, ცოტა ხნის წინ შედგა სატელეფონო საუბარი გიორგი მარგველაშვილსა და გიორგი პაპუაშვილს შორის, რა დროსაც პრეზიდენტი დაინტერესდა იმ განცხადებით, რომელიც საკონსტიტუციო სასამართლოს თავმჯდომარემ დღეს გააკეთა.
„განცხადების გაკეთებისთანავე დაუყონებლივ შედგა სატელეფონო საუბარი და ზარის ავტორი იყო საქართველოს პრეზიდეტი. ჩვენთვის განსაკუთრებით მნიშვენლოვანია, საკონსტიტუციო სასამართლო, ეს არის უმნიშვენლოვანესი სახელმწიფო ინსტიტუტი. შესაბამისად, გულისყურით უნდა მოვეკიდოთ ყველა იმ განცხადებას, რომელიც საკონსტიტუციო სასამართლოზე გავლენის მოხდენას და მასზე ზემოქმედებას ეხება. პრეზიდენტმა საკონსტიტუციო სასამართლოს თავმჯდომარეს შესთავაზა დახმარება არის თუ არა მყისიერი ჩარევა საჭირო, ფიზიკურ უსაფრთხოებასთან დაკავშირებით. რაზეც თავმჯდომარემ განაცხადა, რომ ამის საჭიროება დღეს არ არის“, – განაცხადა ანა დოლიძემ.