უკრაინის საპრეზიდენტო არჩევნებზე რუსი დამკვირვებლები არ იქნებიან მიწვეული. ამის შესახებ უკრაინის საგარეო საქმეთა მინისტრმა პავლო კლიმკინმა განაცხადა.
„რამდენიმე დღის წინ წერილი გავუგზავნე ეუთო-ს დემოკრატიული ინსტიტუტებისა და ადამიანის უფლებების ბიუროს დირექტორს ინგიბორგ სოლრუნ გისლადოტირს, რომ ეუთო-ს სადამკვირვებლო მისია გამოაგზავნოს უკრაინის საპრეზიდენტო არჩევნებზე. სხვა სტანდარტულ საკითხებთან ერთად აღვნიშნე, რომ უკრაინის საგარეო საქმეთა სამინისტრო არ მიიღებს განაცხადებს რუსი დამკვირვებლების რეგისტრირების შესახებ“, – განაცხადა პავლო კლიმკინმა.
უკრაინის საგარეო უწყების ხელმძღვანელმა ასევე აღნიშნა, რომ ეუთო-ს პრაქტიკაში უამრავი ამგვარი პრეცედენტია.
„ამ ზომას საჭიროდ მივიჩნევ, როდესაც საუბარია დამკვირვებლებზე აგრესორი და ოკუპანტი ქვეყნიდან. სხვათა შორის, ეუთო-ს პრაქტიკაში ბევრი ასეთი პრეცედენტი ყოფილა“, – დასძინა მან.
უკრაინაში საპრეზიდენტო არჩევნები 31 მარტს გაიმართება.