სასწრაფო სამედიცინო დახმარების ცენტრი ისტორიას აქვეყნებს.
თბილისის სასწრაფო სამედიცინო დახმარების ცენტრში შეტყობინება შემოვიდა. გამოძახების მოტივი – გული.
ადგილზე მისულ 1718 ბრიგადას, შემადგენლობით – უფროსი ექიმი ფატიმა ფიფია, უმცროსი ექიმი დავით თავაძე, მძღოლი გივი რევაზოვი, ხანშიშესული ქალბატონი გულ-მკერდის არეში ტკივილით დახვდა. პაციენტს დაბალი არტერიული წნევა ჰქონდა. ექიმებმა ქალბატონის სასწრაფო ჰოსპიტალიზაციის შესახებ მიიღეს გადაწყვეტილება. ტრანსპორტირებისას პაციენტის მდგომარეობა კიდევ უფრო დამძიმდა, დაკარგა გონება, გააჩერა სუნთქვა, ხოლო მონიტორზე დაფიქსირდა ასისტოლია ანუ გულის გაჩერება და რომ არა ბრიგადის ექიმების პროფესიონალიზმი, შესაძლოა, სავალალო შედეგი დამდგარიყო.
ექიმებმა პაციენტს წარმატებით ჩაუტარეს პროტოკოლით გათვალისწინებული გულ-ფილტვის რეანიმაცია, რის შედეგადაც მისი მდგომარეობა დასტაბილურდა, აღდგა გულის სინუსური რითმი, არტერიული წნევა და ქალბატონი თბილისის ერთ-ერთ საავადმყოფოში გადაიყვანეს.
🔸თბილისის სასწრაფო სამედიცინო დახმარების ცენტრი პაციენტს სწრაფ გამოჯანმრთელებას უსურვებს.