ჭყონდიდელი მიტროპოლიტი, მეუფე პეტრე, სინოდიდან გარიცხვას ელოდრება.
გასული წლის ბოლოს ჭყონდიდის მიტროპოლიტმა, მეუფე პეტრემ სკანდალური განცხადება გააკეთა. მისი თქმით, აღარ სჯერა პატრიარქის მწყემსიკეთილიანობის. დღეს “ტვ პირველის“ ეთერში მეუფე პეტრემ ისაუბრა, თუ რა შეიძლება მოჰყვეს მის განცხადებებს საპატრიარქოში.
“მე აბსოლუტურად ცივი გონებით ვთქვი, რომ ციანიდის საქმესთან მიმართებაში სინოდის ბოლო სხდომაზე უსამართლობის განცდა დამეუფლა. ამ დასკვნამდე თანმიმდევრულად და ეტაპობრივად მივედი. მითი პატრიარქობის მწყემსიკეთილიანობის ჩემთვის აღარ არსებობს. თვით სახარებაში კარგად არის განმარტებული, თუ რა არის მწყემსი კეთილი. და თუ როგორ უნდა ვიყოთ მწყემსი კეთილი. ჩვენ გვაქვს ამის მაგალითები, როგორც მსოფლიო ქრისტიანობის ისტორიაში, ისე საქართველოს უახლეს ისტორიაში.
მაშინ, როდესაც ციანიდის საქმე სრული შოკი იყო მთელი საზოგადოებისთვის და თვით უწმინდესობა ბძანებს, ცა ჩამოინგრა ჩემთვისო, რეალურად ასე იყო ჩემთვისაც. მეც იგივე განცდა მქონდა. ციანიდის საქმის გაჟღერების შემდეგ პირველად რომ ჩავედი თბილისში, ვხვდებოდი, რომ ხალხი ნებისმიერ სასულიერო პირში ხედავდა მკვლელ მღვდელს და გადავწყვიტე, ჩემი აზრი გამეზიარებინა მოსახლეობისთვის.
მამაო მოვინახულე ციხეში. სანამ ციხეში შევიდოდი, ვამბობდი, რომ ორი ვარიანტი იყო. ის ან უნდა ყოფილიყო ჯვარცმული ავაზაკი. ავაზაკი, რომელმაც სცოდა, მაგრამ მოინანია. ან ის ცილისწამების მსხვერპლი გახდა.
საქმეში გავერკვიე და შემიძლია, გითხრათ, რომ მამაო არის მსხვერპლი ცილისწამების.
როდესაც ეს ვერაგული პოლიტიკა დავინახე ხელისუფლების მხრიდან, რა თქმა უნდა, სასულიერო პირების (საპატრიარქოის რაღაც ჯგუფის მხრიდან) თანამონაწილეობა დავინახე. გადავდგი ბიბლიური და სახარებისეული ნაბიჯი.
უსამართლობას და უზნეობას ჩვენ უნდა ვებრძოლოთ. ფარისევლობა კაცობრიობამ ქრისტეს ჯვარცმამდე მიიყვანა.
მე მიმაჩნია, რომ სინოდი უნდა შეიკრიბოს და უნდა იმსჯელოს იმ ყველაფერზე“, – აცხადებს მეუფე პეტრე.
მეუფე პეტრე არ გამორიცხავს, რომ მისი განცხადებების შემდეგ წმინდა სინოდი დაატოვებინონ.
“მე ყველაფრისთვის მზად ვარ“, – ამბობს მეუფე პეტრე.
მეუფე პეტრემ ისაუბრა, თუ რატომ არ აფიქსირებს საქართველოს საპატრიარქო უკრაინისთვის ავტოკეფალიის მინიჭებასთან დაკავშირებით საკუთარი პოზიციას.
“რა თქმა უნდა, სიფრთხილე საჭიროა, მაგრამ არანაირი წონადობა იმ არგუმენტებს, რომ ჩვენ არ დავდგეთ სიმართლის მხარეს და 50-მილიონიან ქვეყანას, რომელმაც ათწლეულები იბრძოლა, რომ ჰქონოდა დამოუკიდებელი ავტოკეფალური ეკლესია და მიაღწია ამას, რომ არ მივულოცოთ და მათი სიხარული არ გავიზიაროთ. ჩვენ, როდესაც მე-20-ე საუკუნის დასაწყისიდან, წმინდა ილია მართალი ხელმძღვანელობდა ავტოკეფალიის საკითხს, შემდეგ გადაიდო, 43 წლამდე ველოდებოდით სანამ რუსეთის ეკლესია გვაღირებდა, პოლიტიკური ჩარევა იყო იმდროინდელი მმართველის მხრიდან. შემდეგ 90 წელს მივიღეთ ტომოსი და როგორი ბედნიერება იყო ეს ჩვენთვის და სხვისი ბედნიერების გაუზიარებლობა… მაშინ რუსეთის ეკლესიას უნდა მიემსგავსო, რომელიც კაენის მდგომარეობაშია, ძმამ რომ შურით ძმა მოკლა, კაენისეული მდგომარეობაა, როდესაც შურს მისი წარმატება“, – განაცხადა მეუფე პეტრემ.