იუსტიციის მინისტრის, თეა წულუკიანის განცხადებით, სანამ ის თანამდებობაზე იქნება, პრობაციონერებს, რომლებიც რეჟიმს არ არღვევდნენ, პირობითი სასჯელი მოეხსნებათ. ამის შესახებ მინისტრმა ადიგენში, საზოგადოებრივი ცენტრის გახსნის შემდეგ განაცხადა. ინფორმაციას 1tv.ge ავრცელებს.
მინისტრის განმარტებით, ასობით პრობაციონერს პირობითი სასჯელი მოეხსნა, ხვალ, 16 იანვარს კი ასევე 200-ზე მეტის საქმე განიხილება.
“თუკი სასჯელი აღარ ასრულებს თავის ფუნქციას, თუკი ნახევარი არის სასჯელის გასული და პრობაციონერი კარგად იქცევა, არ აქვს რეჟიმის დარღვევა და არ არსებობს მიზეზი, რის გამოც ჩვენ ის უნდა ვატაროთ სააგენტოში, ჩვენი თვითმიზანი არ არის ე.წ. თითის დადება.
ჩვენი მიზანი არის ის, რომ სასჯელმა შეასრულოს თავის ფუნქცია. ასე რომ, ასობით პრობაციონერს მოხსნილი აქვს პირობითი სასჯელი, ხვალ 200-ზე მეტი საქმე ასევე იქნება განხილული და იმედი მაქვს, მე მათ ამას ვუსურვებ, რომ 200-ვე პრობაციონერს ხვალ მოეხსნას პირობითი სასჯელი, ვნახოთ რას გადაწყვეტს კომისია. მაგრამ ჩემი მიდგომა არის ახლებური, ჩემი მიდგომა არის ის, რომ სასჯელი არ უნდა იყოს მისჯილი სასჯელისთვის“, – განაცხადა თეა წულუკიანმა.
მინისტრის თქმით, მთავარია, რომ პრობაციონერები კარგად იქცეოდნენ და რეჟიმს არ არღვევდნენ. მინისტრმა ასევე თქვა, რომ უახლოეს პერიოდში წარადგენს ანგარიშს თუ რა გაკეთდა სასჯელაღსრულების ყოფილ უწყებაში, რომელიც პენიტენციური უწყებისა და პრობაციის სსიპ-ის სახით ჩამოყალიბდა.