საქართველოს პრემიერ-მინისტრი მამუკა ბახტაძე მიუნხენის უსაფრთხოების კონფერენციაში მიიღებს მონაწილეობას.
საქართველოს დელეგაცია, მთავრობის მეთაურის ხელმძღვანელობით, მიუნხენს 15-17 თებერვალს ეწვევა.
პრემიერ-მინისტრის პრესსამსახურის ინფორმაციით, მიუნხენის უსაფრთხოების კონფერენციის ფარგლებში მამუკა ბახტაძე სიტყვით გამოვა რამდენიმე თემატურ დისკუსიაზე, რომლებიც აღმოსავლეთ ევროპაში უსაფრთხოების კუთხით არსებულ ვითარებას და ნატო-ს უკავშირდება.
ასევე, დაგეგმილია მაღალი დონის ორმხრივი შეხვედრები, მათ შორის კოლეგებთან და კონფერენციაში მონაწილე დელეგაციების ხელმძღვანელებთან.
საქართველოს დელეგაციაში, რომელსაც პრემიერ-მინისტრი ხელმძღვანელობს, საგარეო საქმეთა მინისტრი დავით ზალკალიანი და თავდაცვის მინისტრი ლევან იზორია შედიან.
მიუნხენის უსაფრთხოების კონფერენციის ძირითადი საკითხები წელს ევროკავშირის გაძლიერება და ტრანსატლანტიკური თანამშრომლობაა. კონფერენციის ფარგლებში დისკუსია ასევე შეეხება შეიარაღების კონტროლის საკითხებსა და თავდაცვის სფეროში თანამშრომლობას, ვაჭრობისა და საერთაშორისო უსაფრთხოების შესაძლო გადაკვეთის წერტილებს, ისევე, როგორც კლიმატის ცვლილების ეფექტსა და ტექნოლოგიური ინოვაციების გავლენას საერთაშორისო უსაფრთხოებაზე.
მიუნხენის კონფერენციაში წელს 35-ზე მეტი სახელმწიფოსა და მთავრობის მეთაური, 50 ქვეყნის საგარეო საქმეთა და 30 ქვეყნის თავდაცვის მინისტრი მიიღებს მონაწილეობას.