ოტობაია-ორსანტიას ხიდთან ოკუპირებული აფხაზეთის მხრიდან ჭირისუფალმა საგანგებოდ მიასვენა მიცვალებული, რათა ხიდის მეორე მხარეს, ენგურს აქეთ მყოფ ნათესავებს მისი დატირება შესძლებოდათ. ხიდის ორივე მხარეს გალში გარდაცვლილ 53 წლის გოჩა ტუფურიას გლოვობენ. ამის შესახებ ინფორმაციას “რადიო ათინათი“ ავრცელებს.
რადიოს ცნობით, გარდაცვლილის ახლობლებმა და ნათესავებმა, ვინც აფხაზეთში გადასვლა ვერ შეძლო, ოჯახს ამ ფორმით გამოუცხადა სამძიმარი.
“ექვსი წელია, არ მინახავს. ბოლოს მამაჩემის გასვენებაზე ვნახე. მაშინ მოვახერხე და გადავედი. ამის მერე არც აქეთ გადმოსულა და ვერც მე მოვახერხე იქით გადასვლა. ეს ძალიან რთულია, ასეთ ვითარებაში, რომ გვიწევს ახლობლის დატირება. ჩვენი ბევრი ახლობელი ცხოვრობს იქით. ახლახან ბიცოლა გარდამეცვალა და ვერ დავიტირე. სად უნდა წავსულიყავი, ან როგორ გადავიდოდი. ასეთი შემთხვევების დროს მაინც, ხომ უნდა შეგვეძლოს რომ გადავიდეთ”, – თქვა ელისო ფარულავამ, რომელიც გარდაცვლილის ბიძაშვილია.
სოფელ ორსანტიის მოსახლეობის თქმით, ეს პირველი შემთხვევა არ არის, როდესაც მიცვალებულს შორიდან გლოვობენ.
ფოტო: რადიო ათინათი
გარდაცვლილის ნათესავების ნაწილმა ოტობაიაში გარკვეული თანხის სანაცვლოდ, კერძოდ 200 ლარად შეძლო მოხვედრა.
აფხაზეთის დეფაქტო მთავრობამ ხურჩა-ნაბაკევისა და ოტობაია–ორსანტიას გამშვები პუნქტები 2017 წლის 5 მარტს დახურა. ეს გადაწყვეტილება სოხუმში 2016 წლის 28 დეკემბერს მიიღეს. მას შემდეგ აფხაზეთში მიმოსვლა მხოლოდ ენგურზე მდებარე ე.წ. სასაზღვრო გამშვები პუნქტითაა შესაძლებელი. ოკუპირებულ ტერიტორიაზე გადასვლა მოქალაქეებს დროებითი ბინადრობის მოწმობით ან გარკვეული თანხის გადახდის სანაცვლოდ შეუძლიათ.