სვანეთში, უშგულის კოშკებს რეაბილიტაცია ჩაუტარდება. სამუშაოები უახლოეს პერიოდში დაიწყება. დაგეგმილი ინფრასტრუქტურული სამუშაოების შესახებ მთავრობის ადმინისტრაციის რეგიონული მიმართულების ხელმძღვანელმა სოზარ სუბარმა ისაუბრა.
“უახლოეს მომავალში, მესტიის მუნიციპალიტეტის, ლაღამის უბნის და უშგულის ადმინისტრაციული ერთეულის კოშკების რეაბილიტაციის პროექტირება დაიწყება”, – განაცხადა სოზარ სუბარმა და დასძინა, რომ ინფრასტრუქტურული პროექტები სხვა რეგიონებშიც განხორციელდება, მათ შორის კახეთში და სამეგრელოში.
“იგეგმება თელავის ცენტრის რეაბილიტაცია, ასევე გურჯაანის მუნიციპალიტეტის, სოფელ ველისციხის ცენტრის რეაბილიტაცია. დაიწყება ასევე ზუგდიდის ცენტრის და ცენტრალური ბულვარის პროექტირება. მოხდება ასევე რამდენიმე რაიონული გზის რეაბილიტაცია, კერძოდ გურჯაანის მუნიციპალიტეტის სოფელ ველისციხის და სოფელ ჭერემის გზების რეაბილიტაცია”,- განაცხადა სოზარ სუბარმა.