თურქეთ-საქართველოს მეგობრობა სამუდამოა, ამას ჩვენ არ დავივიწყებთ, ამიტომაც ვასახელებ ამ ვიზიტს ისტორიულად, – ამის შესახებ თურქეთის ელჩმა საქართველოში, ზექი ლევენთ გუმრუქჩუმ “მაესტროს ფაქტორის” პირდაპირ ეთერში განაცხადა.
ელჩმა აღნიშნა, რომ ყველაზე რთულ ვითარებაში, გიორგი კვირიკაშვილის ანკარაში ვიზიტი, თურქეთის თითოეული მოქალაქისთვის ბევრს ნიშნავდა.
“ბატონი კვირიკაშვილი პირველი მაღალი რანგის პირია, რომელიც მცირე და მაღალი დელეგაციით ანკარაში ჩავიდა. ძალიან ადვილია იყო მეგობარი, როდესაც ყველაფერი კარგად არის. მეგობრობა კრიტიკულ პერიოდში ვლინდება. პრემიერ კვირიკაშვილის ვიზიტმა კიდევ ერთხელ დაამტკიცა, რომ საქართველო ჩვენი სტრატეგიული მეგობარია. თურქეთ-საქართველოს მეგობრობა სამუდამოა, ამას ჩვენ არ დავივიწყებთ, ამიტომაც ვასახელებ ამ ვიზიტს ისტორიულად, რადგან გააჩნია სიმბოლური და პოლიტიკური დატვირთვა გამომდინარე დროის მონაკვეთიდან“,- განაცხადა ელჩმა.
თურქეთში მომხდარი ამბოხების მცდელობის შემდეგ, საქართველოს პრემიერ-მინისტრი გიორგი კვირიკაშვილი ანკარაში იმყოფებოდა, სადაც შეხვედრები გამართა თურქეთის პრემიერ-მინისტრსა და პრეზიდენტთან. გიორგი კვირიკაშვილმა კიდევ ერთხელ გამოხატა საქართველოს მთავრობის მხარდაჭერა თურქეთის დემოკრატიულად არჩეული ხელისუფლებისა და თურქი ხალხისადმი.