ვიდეო არქივი

ირაკლი ღარიბაშვილმა ხულოს მერობის კანდიდატად ვახტანგ ბერიძე წარადგინა (ვიდეო)

2019/04/10 15:33:22
ნანახია 371 ჯერ

„ქართული ოცნება – დემოკრატიული საქართველოს“ პოლიტიკურმა მდივანმა, ირაკლი ღარიბაშვილმა  ხულოში მერობის კანდიდატად ვახტანგ ბერიძე წარადგინა.

ხულოს მერობის კანდიდატის წარდგენამდე ღარიბაშვილი მოსახლეობას გაესაუბრა.

„მიხარია, რომ ყველა თაობის წარმომადგენელს ვხედავ დღეს აქ შეკრებილს. ვხედავ უხუცესებს, ჩვენს ღირსეულ ხალხს, ვხედავ ჩვენს დედებს, ჩვენს ძმებს, ახალგაზრდებს ვხედავ, ჩვენს ბავშვებს ვხედავ, ჩვენს მომავალს ვხედავ.

ვუყურებ რა ამ ადამიანებს თვალებში, მინდა გითხრათ, რომ ჩვენ მთავრობას გვაქვს სრული ვალდებულება და ვიღებთ პასუხისმგებლობას, რომ თქვენ ერთგულად გემსახურებით.

ზემო აჭარა, ეს არის ჩვენი სიამაყე, თქვენ ხართ გმირი ხალხი. სხვა არაფერია თუ არა გმირობა, რომ აქ, ზემო აჭარაში ხართ ასე ძლიერად და ინარჩუნებთ ამ ულამაზეს მხარეს. მხარეს, რომელიც გამორჩეულია თავისი უნიკალურობით და რაც მთავარია თავისი განსაკუთრებული ხალხით. თქვენს გარეშე რა თქმა უნდა ეს მხარე არ იქნებოდა ასეთი ლამაზი.

მინდა, ყველას მოთმინებისთვის გულწრფელად მადლობა გადაგიხადოთ. ჩვენმა მთავრობამ, რაც ხელისუფლებაში მოვედით, ბევრი საქმე გააკეთა, ყველა მიმართულებით გვაქვს პროგრესი, მაგრამ რა თქმა უნდა იყო შეცდომებიც. ამ შეცდომებს ჩვენს ვხედავთ და ეს არის დღევანდელი მაგალითიც, რომ დღევანდელი კანდიდატის ჩანაცვლებით ანუ ვახტანგ ბერიძის ჩანაცვლებით, ჩვენ გავაუმჯობესებთ სიტუაციას, უფრო მეტად დაგეხმარებით.

კარგად გვესმის ყველა ის გამოწვევა, რომელიც ჩვენს ქვეყანას აწუხებს: სიღარიბე, უმუშევრობა, დასაქმების პრობლემა ახალგაზრდებისთვის, მეტი ჩართულობა თქვენი“, – განაცხადა ირაკლი ღარიბაშვილმა.

ის დაპირდა მოსახლეობას, რომ პარტიის ხელმძღვანელის ლიდერობით, მმართველი გუნდი ამ პრობლემებს სწრაფად და ხარისხიანად გამოასწორებს.

„ბოლოს, მინდა გითხრათ, რომ ნურავის ნუ ექნება იმედი, ამ შემთხვევაში მინდა მივმართო ჯერ კიდევ ოპონენტებად წოდებულებს, რომლებსაც საზოგადოებაში შემოაქვთ მხოლოდ დესტრუქცია და შუღლი, დაპირისპირება და ქაოსი, ამ ადამიანების ადგილი ჩვენს საზოგადოებაში კი არა, პოლიტიკაში არ უნდა იყოს. მოძალადე მმართველების ადგილი საქართველოში აღარ უნდა დაბრუნდეს.

მინდა დავასრულო გამოსვლა იმით, რომ ხულოს ჰყავს ძალიან ღირსეული დეპუტატი, ანზორ ბოლქვაძე, გეყოლებათ ღირსეული მერი ვახტანგ ბერიძე და გყავთ რეგიონის ხელმძღვანელი ბატონი თორნიკე, ახალგაზრდა და ენერგიული კაცი.

ჩვენ ერთად გპირდებით, ერთიანი ძალისხმევით ყველა პრობლემას ეტაპობრივად გადავჭრით და ვიქნებით თქვენს სამსახურში“, – განაცხადა ირაკლი ღარიბაშვილმა.

კომენტარები