კომპანიათა ჯგუფის Louis Vuitton Moet Hennessy (LVMH) მფლობელი ბერნარ არნო და მისი ოჯახი ხანძრის შედეგად დაზიანებული პარიზის ღვთისმშობლის ტაძრის აღსადგენად 200 მილიონ ევროს გამოყოფს. ამის შესახებ სააგენტო AFP იუწყება.
„ეროვნულ ტრაგედიასთან სოლიდარობის ნიშნად არნოს ოჯახი და ჯგუფი LVMH ამ არაჩვეულებრივი ტაძრის, საფრანგეთის სიმბოლოს რეკონსტრუქციას უერთდება“, – ნათქვამია ოჯახის განცხადებაში.
მანამდე ფრანგმა მილიარდერმა და Gucci-სა და Yves Saint Laurent-ის მოდის სახლების ხელმძღვანელმა ფრანსუა-ანრი პინომ ხანძრისგან დაზიანებული ნოტრ-დამის აღსადგენად 100 მილიონ ევროს გადარიცხვის პირობა დადო. ევროკომისია ტაძრის აღსადგენად ევროპულ გრანტს გამოყოფს.
პარიზის ღვთისმშობლის ტაძარში ხანძრის შედეგად განადგურდა ტაძრის აღმოსავლეთ ნაწილში მდებარე ჯვრის ფორმის გუმბათი და მასზე აღმართული ერთ-ერთი შპილი, რომლის ჩამონგრევის კადრებმა მთელი მსოფლიო მოიცვა.
ამასთან, ხანძარი არ შეხებია ტაძრის წინა, დასავლეთ ნაწილში მდებარე მრგვალ სარკმელს – ვარდულს და ორ მთავარ კოშკს. მანამდე ვრცელდებოდა ინფორმაცია, რომ მრგვალი სარკმელები სავარაუდოდ განადგურდა.
საფრანგეთის პრეზიდენტმა ემანუელ მაკრონმა ნოტრ-დამის აღდგენის პირობა დადო. მისი თქმით, ტაძრის რესტავრაციის შემოწირულობისთვის ანგარიში გაიხსნება.