პარლამენტის სამი კომიტეტის გაერთიანებულ სხდომაზე სახელმწიფო უსაფრთხოების სამსახურის ხელმძღვანელის მოადგილე გრიგოლ ლილუაშვილმა 2018 წლის ანგარიში წარადგინა.
როგორც მან განაცხადა, უსაფრთხოების სამსახურის უმნიშვნელოვანესი მიმართულება ტერორიზმის წინააღმდეგ ბრძოლაა, რასაც უწყება წარმატებით ახორციელებს.
“ძირითად გამოწვევას წარმოადგენს საქართველოსთვის, როგორც მთელი მსოფლიოსთვის ისლამური სახელმწიფო და მასთან დაკავშირებული დაჯგუფებები. საანგარიშო პერიოდში ისლამური სახელმწიფო მოქმედებას აგრძელებდა, დასუსტებისა და ტერიტორიული დანაკარგების შემდეგ შემუშავებული ახალი ტაქტიკით. აღნიშნულის ფარგლებში „დაეშისთვის“ პრიორიტეტი აღარ იყო მხარდამჭერების სირიასა და ერაყში მობილიზება.
ტერიტორიული ორგანიზაციის მთავარ იარაღად იქცა კონფლიქტის ზონის მიღმა ტერორისტული აქტების განხორციელება. დიდი ალბათობით, შრი-ლანკაშიც მომხდარი ტერორისტული აქტები მათ მიერ იყო განხორციელებული. „დაეში“ მთელი მსოფლიოს მასშტაბით თანამედროვე ტექნოლოგიების, ინტერნეტ სივრცისა და სოციალური ქსელების გამოყენებით აქტიურად აგრძელებს თავისი იდეოლოგის გავრცელებას; ახდენს რადიკალიზებული პირების მობილიზებას და მათ გადაბირებას,“– განაცხადა გრიგოლ ლილუაშვილმა.
ანგარიშის მიხედვით შემცირდა ტერორისტული ორგანიზაციების მიერ საქართველოს ტრანზიტულად გამოყენების ფაქტები.
“იქიდან გამომდინარე, რომ არსებობს მცდელობის ფაქტები, სახელმწიფოს საბაჟო და სასაზღვრო-გამშვები პუნქტები მკაცრად კონტროლდება. მეთვალყურეობას ექვემდებარება მარშრუტები და არხები, რომლებიც შესაძლოა, ქვეყანაში არალეგალურად მოსახვედრად იყოს გამოყენებული. ამ თვალსაზრისით საქართველო არ მიეკუთვნება მაღალი რისკის ჯგუფსს, შესაბამისად, ნებისმიერ ბრალდებას განსაკუთრებული აქტივობების შესახებ, სუს-ი განიხილავს, როგორც მიზანმიმართულ პროვოკაციას,“ – განაცხადა გრიგოლ ლილუაშვილმა ანგარიშის წარდგენისას.