მინდა კიდევ ერთხელ ვუთხრა ჩვენს ხალხს, რომ გავაგრძელებთ ყველა პროგრამას – ჯანდაცვისა და სოციალურ პროგრამებს, სოფლის მეურნეობისა და მეწარმეობის ხელშემწყობ პროექტებს, ინფრასტრუქტურულ პროექტებს და ყველა დაწყებულ საქმეს ბოლომდე მივიყვანთ, სანამ არ დავინახავთ, რომ ეს აისახა თითოეულ ადამიანზე, – ამის შესახებ საქართველოს პრემიერ-მინისტრმა გიორგი კვირიკაშვილმა რუსთავში ”ქართული ოცნება-დემოკრატიული საქართველოს” მაჟორიტარი დეპუტატობის კანდიდატების წარდგენისას სიტყვით გამოსვლისას განაცხადა.
როგორც საქართველოს პრემიერ-მინისტრმა რუსთავში მოსახლეობას განუცხადა, ხელისუფლება გააგრძელებს ასევე ადგილობრივი სოფლის მეურნეობის ხელშეწყობას, რადგან რეგიონი მთელ საქართველოს ნატურალური ქართული პროდუქტით ამარაგებს.
”ქვემო ქართლი აგრარული რეგიონია და ამიტომ ამ რეგიონში სოფლის მეურნეობის ხელშეწყობა ძალიან მნიშვნელოვანია. ეს საჭიროა აქაური მოსახლეობისთვის, რომელიც გულმოდგინედ შრომობს, მოსავალი მოჰყავს და ნატურალური ქართული პროდუქტით ამარაგებს მთელ საქართველოს. იცით, რომ ჩვენმა მთავრობამ არაერთი პროექტი წამოიწყო, რომლებმაც სოფელს, ხალხს ამოსუნთქვის საშუალება მისცა. ჩვენ ხვნის პროცესში დავეხმარეთ მათ, ვინც წლების განმავლობაში მძიმე ეკონომიკური ვითარების გამო მიწებს ვერ ამუშავებდა და დღეს პრაქტიკულად მიტოვებულ, ყამირად ქცეულ მიწებს სასოფლო-სამეურნეო დანიშნულება დაუბრუნდა.
მინდა კიდევ ერთხელ ვუთხრა ჩვენს ხალხს, რომ გავაგრძელებთ ყველა პროგრამას – გავაგრძელებთ ჯანდაცვისა და სოციალურ პროგრამებს, სოფლის მეურნეობისა და მეწარმეობის ხელშემწყობ პროექტებს, ინფრასტრუქტურულ პროექტებს და ყველა დაწყებულ საქმეს ბოლომდე მივიყვანთ, სანამ არ დავინახავთ, რომ ეს აისახა თითოეულ ადამიანზე, თითოეული ოჯახის ცხოვრებაზე, მის კეთილდღეობაზე.
ამიტომაც თამამად შემიძლია გითხრათ, მოგმართოთ ქვემო ქართლის მოსახლეობას, განსაკუთრებით კი, მინდა მივმართო ჩვენს აზერბაიჯანელ ძმებს – ჩვენი ქვეყნის ერთგულ ხალხს და კიდევ ერთხელ მადლობა ვუთხრა ძმობისთვის და თავდადებული შრომისთვის. ჩვენ თქვენს ნდობას გავამართლებთ და თქვენი გვერდში დგომით, ერთად გავიმარჯვებთ! „ქართული ოცნება“ კვლავ თქვენს სამსახურში იქნება”, – განაცხადა გიორგი კვირიკაშვილმა.