“ათასობით ადამიანი ამ პროცესში არის ჩართული და იმედის თვალით შემოგვყურებს. ფინიშის სწორს მნიშვნელოვანი შეცდომის დაშვების უფლება არ გვაქვს. მე ვარ მომხრე მწვავე ოპონირებისა საკრებულოებში, პარლამენტში, ქუჩის აქციებისაც. თუ რამეს ამ წლების განმავლობაში ვაკეთებ და თუ ვინმე რადიკალიზმით გამოირჩევა ვარ მე და როგორ შეიძლება მელიას დააბრალო, რომ არ სურს პროცესის რადიკალიზება, რომელსაც მოჰყვება ივანიშვილი რეჟიმის დამარცხება ?!”, — ამის შესახებ “ნაციონალური მოძრაობის” ერთ-ერთმა ლიდერმა ნიკა მელიამ ტელეკომპანია “პირველის” გადაცემაში “რეაქცია” განაცხადა.
ნიკა მელიამ ოპოზიციის ზოგიერთი ლიდერის მხრიდან “წინდაუხედავ განცხადებებზე” ისაუბრა. მან თქვა, რომ “ბევრი ოპოზიციური პოლიტიკოსი გამოდის, რომ დავიწყებ რევოლუციას და არ იწყება ეს რევოლუცია”, რაც ამომრჩეველს “უარეს სასოწარკვეთაში აგდებს.
ნიკა მელიას განცხადებით, გაერთიანებული ოპოზიცია უნდა შეიკრიბოს და ერთად გადაწყვიტონ სამოქმედო გეგმა. ის ფიქრობს, რომ ემოციურ ფონზე განცხადებები არ უნდა გაკეთდეს.
მისივე თქმით, “უშედეგო მანიფესტაციის მოწყობა მთელი ოპოზიციის მარცხი იქნება”. მას არ ჰგონია, რომ მნიშვნელოვან გადაწყვეტილებებთან დაკავშირებით ნაჩქარები განცხადებები უნდა გაკეთდეს.
“თუ რამე იწვევს ფრუსტრაციასა და იმედგაცრუებას, ემპირიულად ეს გამოცდილება მეც მივიღე, როცა ჩამოგვიყვანია ჩვენი მხარდამჭერები და აქცია შეგვიწყვეტია იმავე დღეს. ჩვენ ახლა ბევრი უნდა ვიმუშავოთ ყველამ ერთად. სადღაც-სადღაც არის შედეგები გასაუმჯობესებელი”, — განაცხადა მელიამ.
მისივე თქმით, სადაც თავად არიან გასაძლიერებლები, ეს არ უნდა ნიშნავდეს იმას, რომ “ბიძინა ივანიშვილს უძლეველობა დავაბრალოთ”.
“ბიძინა ივანიშვილს არჩევნები კი არა, ჯოკერი რომ ვეთამაშოთ, ისიც უნდა მოვუგოთ. ივანიშვილის სახლთან სოლოლაკში თუ შევიკრიბებით, იქიდან უნდა ჩამოვიდეთ გამარჯვებულები. ვეთანხმები, მაგრამ კარგად არის ეს ყველაფერი მოსაფიქრებელი”.
ჟურნალისტის კითხვაზე არის თუ არა გუნდში განხეთქილება, ნიკა მელია პასუხობს: “სტრატეგიაში ვთანხმდებით, ვთანხმდებით მთავარ პრინციპებში, მაგრამ, შესაძლებელია, ტაქტიკური მოსაზრებები განსხვავდებოდეს”.
ნიკა მელიას აღნიშნულ გაცხადებებს წინ უძღოდა მიხეილ სააკაშვილისა და სანდრა რულოვსის რევოლუციური მოწოდებები.
მიხეილ სააკაშვილი: “ჩვენ უნდა ვიყოთ, შეტევაზე, შეტევაზე და მხოლოდ შეტევაზე”.
სანდრა რულოვსი: “თქვენ მე არ მიცნობთ. ჩვენ მოგებული გვაქვს პირველი ტური, თუ ისინი გამოაცხადებენ პირველ ტურში გამარჯვებას, მიიღებენ მთელი ქვეყნის პროტესტს, მე ვადასტურებ ამას”.