ალბათ, ყველამ კარგად იხილა, რომ აქ ადგილი არ ჰქონდა უბრალოდ ძალადობისკენ მოწოდებებს, რომლებიც ძალადობის განხორციელების რეალურ საფრთხეს ქმნის და სისხლის სამართლის წესით დასჯადია, აქ სახეზე იყო უკვე რეალიზებული ძალადობა, ძალადობის შემდგარი ფაქტი, – ამის შესახებ შინაგან საქმეთა მინისტრის მოადგილემ, ნათია მეზვრიშვილმა განაცხადა.
20-21 ივნისის მოვლენებში ნიკა მელიას მონაწილეობის შესახებ მეზვრიშვილმა ტელეკომპანია „იმედის“ ეთერში ისაუბრა. შს მინისტრის მოადგილემ დამატებითი მუხლით კვალიფიკაციის შესახებაც გააკეთა განმარტება.
,,მას შემდეგ, რაც გამოძიების მიმდინარეობისას მოვიპოვეთ კონკრეტული მტკიცებულებები, გაჩნდა კვალიფიკაციის დამატების აუცილებლობა. ხაზგასმით აღვნიშნავ – კვალიფიკაცია არ შეცვლილა – დაემატა კვალიფიკაცია რაკი შესაბამისი სამართლებრივი საფუძველი, არსებობდა კონკრეტულ მტკიცებულებებზე დაყრდნობით. გამოძიება მიმდინარეობს როგორც 225-ე მუხლით, რომელიც ჯგუფური ძალადობის ორგანიზებას გულისხმობს ისე, 315- ე მუხლით, რომელიც სახელმწიფოს წინააღმდეგ მიმართული დანაშაულია“, – განაცხადა მეზვრიშვილმა.
რაც შეეხება გამოძიების პროცესს, შინაგან საქმეთა მინისტრის მოადგილე იმედოვნებს, რომ კონკრეტული შედეგები მალე დაიდება.
,,იმედი მაქვს, რომ ძალიან მოკლე დროში კონკრეტულ შედეგებს დავდებთ სამართალდამცავი ორგანოები და კონკრეტულ მტკიცებულებებს მოვიპოვებთ, რაც უკვე უფრო მაღალი სტანდარტით მოგვცემს ამ კვალიფიკაციით კონკრეტული ქმედების ჩადენის დადასტურების შესაძლებლობას“, – განაცხადა ნათია მეზვრიშვილმა.