გიორგი ცუცქირიძე – ივნისში ეკონომიკის 5%-იანი ზრდა საგარეო კურსზე რევოლუციური სცენარის ღია ზეგავლენას ადასტურებს

„ივნისში ეკონომიკის 5%-იანი ზრდა საგარეო კურსზე რევოლუციური სცენარის ღია ზეგავლენას ადასტურებს“, – ექსპერტი ეკონომიკის საკითხებში, გიორგი ცუცქირიძე სოციალურ ქსელში ლარის გაუფასურების მიზეზებზე საუბრობს.
„2019 წლის ივნისში, წინა თვეების ანალოგიურად, წინა წლის შესაბამის პერიოდთან შედარებით მაღალი ეკონომიკური ზრდა დაფიქსირდა და 5.0 პროცენტი შეადგინა, ხოლო 2019 წლის იანვარ-ივნისის საშუალო ზრდა 4.9 პროცენტს გაუტოლდა.
ივნისში ეკონომიკური ზრდა და საგარეო მოწყვლადობის შემცირებაც ადასტურებს, რომ, განსაკუთრებით 24 ივნისიდან მოყოლებული, ლარის გაუფასურების მიზეზი არის არა ფუნდამენტური ეკონომიკური ფაქტორები, რაზეც ოპოზიცია და ცალკეული ექსპერტები მუდმივად აპელირებენ, არამედ – 20-21 ივნისიდან განვითარებული რევოლუციური სცენარის პირდაპირი ზეგავლენა, რაც აისახა გაზრდილ საგარეო შოკებში, პირველ ყოვლისა, ტურისტულ ნაკადებზე ნეგატიური ზეგავლენის თვალსაზრისით; სავალუტო კურსის გაუფასურების ფაქტორებიდან საგარეო ვაჭრობაზე არანაკლებ ნეგატიურ ზეგავლენას სწორედ პოლიტიკური რყევები და ნეგატიური მოლოდინები ახდენს.
აქედან გამომდინარე, ივნისში ეკონომიკის 5%-იანი ზრდაც, რაც აღემატება საერთაშორისო სავალუტო ფონდის მიერ წლის დასაწყისში 4.6%-ზე გათვლილ, წლიური ზრდის საპროგნოზო მაჩვენებელს, ადასტურებს დღეს საგარეო კურსზე რევოლუციური სცენარის ღია ზეგავლენას.
ახლა მთავარია, პოლიტიკური ტემპერატურის დაწევით მაქსიმალურად შემცირდეს ეკონომიკაზე მიმდინარე პროცესების ნეგატიური ზეგავლენა, რასაც ხელს შეუწყობს 2019 წლის მეორე ნახევარში დაგეგმილი მნიშვნელოვანი ეკონომიკური რეფორმებისა და კერძო სექტორის ხელშემწყობი ინიციატივების დროული განხორციელება, პირველ ყოვლისა, მეწარმეობისა და ტურისტული ინდუსტრიის მხარდაჭერის კუთხით“, – წერს ცუცქირიძე „ფეისბუქის“ საკუთარ გვერდზე.