ტელეკომპანია „იმედის“ თანამშრომლები: „ქრონიკის“ ჟურნალისტები და imedinews-ის რედაქტორები რუსეთ-საქართველოს ომზე ტელეკომპანიის ეთერით გასული ფილმის სულისკვეთებას არ იზიარებენ, რასაც „ფეისბუქზე“ ფლეშმობით აპროტესტებენ. ამის შესახებ ტელეკომპანიის თანამშრომლებმა სოციალურ ქსელში დაწერეს.
საქმე ეხება ტელეკომპანია „იმედის” ეთერში 11 აგვისტოს გასულ ფილმს – „ჩვენ მშვიდობით მოვიგებთ სხვის დაწყებულ ომს”, რომელმაც საზოგადოების ნაწილისგან კრიტიკა დაიმსახურა.
“იმედის” თანამშრომლების “ფეისბუქის” გვერდზე ერთნაირ ტექსტს აქვეყნებენ და წერენ, რომ ემიჯნებიან ფილმის “ერთ-ერთ მთავარ ხაზს”.
“არ ვიზიარებ რუსეთ-საქართველოს ომის შესახებ მომზადებული მასალის ერთ-ერთ მთავარ ხაზს. მიუღებელია რუსეთის ჯარის საქართველოში იძულებით შემოჭრის თაობაზე გამოთქმული ვერსია და ამას წლების განმავლობაში ომის თემაზე ჩვენ მიერ მომზადებული რეპორტაჟები ადასტურებს!“- წერენ ჟურნალისტები.
აღნიშნულ პროტესტს TSpress.ge-ს დამფუძნებელი და რედაქტორი ელისო ჯანაშია “ფეისბუქი”პირად გვერდზე გამოეხმაურა:
“იმედის ჟურნალისტებიც კი გაცილებით დამოუკიდებლები ყოფილან, ვიდრე ბელადს ჩამოკიდებული “რ2″- ელები. მათ არასოდეს დაუგმიათ ან მოუბოდიშებიათ მიშას რუპორობის გამო, ასევე გააგრძელეს დღემდე”, – დაწერა ელისო ჯანაშიამ სოციალურ ქსელში.
“იმედის”ჟურნალისტების განცხადებით, აღნიშნილ პოზიციას “ქრონიკის” ყველა ჟურნალისტი იზიარებს, მათი თქმით, იგივე აზრზე არიან სხვა განყოფილებაში მომუშავე ჟურნალისტებიც.
ფილმი, სახელწოდებით “ჩვენ მოვიგებთ სხვის დაწყებულ ომს” TV – “იმედმა” 12 აგვისტოს გამოაქვეყნა. 36-წუთიანი ფილმის მიხედვით, 2008 წლის აგვისტოს ომი ქართულმა მხარემ დაიწყო.
ასევე საუბარია ყოფილი ხელისუფლების პასუხისმგენლობაზე და ნათქვამია, რომ “ნაციონალურმა მოძრაობამ” ომის შედეგად “ლეგიტიმაციის საჭირო ხარისხი მოიპოვა”.
ფილმი ოპოზიციამ და მედია ექსპერტებმა მწვავედ გააკრიტიკეს და აცხადებდნენ, რომ ტელეკომპანია “იმედში” მუშაობა – “სირცხვილია”.
მოგვიანებით ფილმთან დაკავშირებით განმარტება გააკეთა არხის გენერალური დირექტორის მოადგილე ნიკა ლალიაშვილმა:
„პროდიუსერი ვარ მე. ეს რეპორტაჟი დამზადდა ჩემს მიერ, ჩემი პროდუსინგის ქვეშ. ჩემი ხელმძღვანელობით. რაც შეეხება ფილმის ავტორებს, ფილმის ავტორი არის მერაბ მამარდაშვილი, რომელიც ბულინგით მოკლეს იმის გამო, რომ სიმართლეს აყენებდა ყველაფერზე მაღლა. ფილმის ავტორი არის ის ასეულობით ჩვენი ჯარისკაცი რომელიც გმირულად შეეწირა სააკაშვილის ავანტიურას. ამ ფილმის ავტორი არის დევნილები, რომლებიც არიან მსხვერპლი ამ ავანტიურის და ბოლოს, ამ ფილმის ავტორი არის ქართული საზოგადოება რომელმაც მშვენივრად იცის ყველაფერი და რომელსაც 11 წელი უკრძალავდნენ უბრალოდ სიმართლის თქმას. აღებული არის ის დოკუმენტები რომელსაც ხელს აწერდა მათ შორის სააკაშვილის ხელისუფლებაც. აღებული არის ევროსაბჭოს დასკვნები. ის ადამიანები არიან გამოყვანილი ვინც ლაპარაკობენ იმ პერიოდზე და არიან თვითმხილველები ამ ყველაფრის“, – განაცხადა ნიკა ლალიაშვილმა.