მსჯავრდებული დეკანოზის, გიორგი მამალაძის ჯანმრთელობის მდგომარეობიდან გამომდინარე, მისი ოჯახი და ადვოკატები საქართველოს პრეზიდენტს მის შეწყალებას სთხოვენ.
შესაბამისი განცხადებით და შუამდგომლობის თხოვნით მათ პრეზიდენტის ადმინისტრაციასა და საპატრიარქოს უკვე მიმართეს.
გიორგი მამალაძის ძმა, თორნიკე მამალაძე „პრაიმტაიმთან“ საუბარში ამბობს, რომ უახლოესი შეწყალების აქტს პრეზიდენტი სავარაუდოდ 28 აგვისტოს, მარიამობის დღესასწაულისთვის გამოსცემს და იმედი აქვს, რომ შეწყალებულთა სიაში მისი ძმაც მოხვდება.
თორნიკე მამალაძის თქმით, სწორედ ამ გადაწყვეტილებაზეა დამოკიდებული, გააგრძელებს თუ არა ის საპროტესტო აქციებს.
„იმედი მაქვს, რომ ერთხელ და სამუდამოდ გაუნათდებათ გონება და უდანაშაულო ადამიანს გაათავისუფლებენ. დაველოდოთ, უფლის იმედი მაქვს. თუ არ ვცდები მარიამობას არის შეწყალებები და კეთილგონიერება ეყოფათ. გამოჩნდება უნდათ თუ არ უნდათ ამ ადამიანის გაწირვა ბოლომდე. ამას დავინახავთ მარიამობის დღესასწაულზე. შეწყალება ბრალის აღიარებას არ ნიშნავს, პრეზიდენტს აქვს უფლება ამის გარეშეც შეიწყალოს პატიმარი“,- განუცხადა „პრაიმტაიმს“ თორნიკე მამალაძემ.
იმის მიუხედავად, რომ დეკანოზის შეწყალებაზე ორჯერ თქვა უარი ყოფილმა პრეზიდენტმა გიორგი მარგველაშვილმა, ადვოკატებიც და ოჯახიც იმედს არ კარგავს. მითუმეტეს, რომ მათი განცხადებით, დეკანოზის ჯანმრთელობის მდგომარეობა ბოლო პერიდოში უკიდურესად დამძიმდა და მის სიცოცხლეს უკვე საფრთხე ემუქრება.
„მივმართეთ საპატრიარქოს დამატებით გვიშუამდგომლოს. ვიმედოვნებთ რომ პატრიარქს ექნება შემხებლობა ამ წერილთან და მიიღებს დადებით გადაწყვეტილებას. იმედია მათში გაიღვიძებს ადამიანური და მართლმადიდებლური გრძნობები და არ გაადააყოლებენ პირად ამბიციებს ადამიანის სიცოცხლეს“- აცხადებს „პრაიმტაიმთან“ საუბარში დეკანოზის ადვოკატი მიხეილ რამიშვილი.
როგორც ცნობილია ე.წ. ციანიდის საქმე სტარსბურგის სასამართლოში გაიგზავნა. მიხეილ რამიშვილის თქმით, ის 100%-ით დარწმუნებულია, რომ ევროსასამართლო დეკანოზს გაამართლებს და ამბობს, რომ გამამართლებელ განაჩენს დეკანოზი ცოცხალი უნდა შეხვდეს. ამისთვის კი მისი საპატიმროდან გათავისუფლებაა საჭირო.
„უკვე სტრასბურგშია საქმე. მოგეხსენებათ გარკვეული პერიოდი სჭირდება – შესაძლოა 1 წელიწადზე მეტიც და ის მტკიცებულებები რაც არის გაგზავნილი, იქიდან გამომდინარე სტრასბურგს მოუწევს დაადგინოს მამალაძის უდანაშაულობა, იმიტომ, რომ ჩვენთან მართლმსაჯულება უკვე დიდი ხანია გარდაცვლილია. 100% პასუხისმგებელი ვარ და დარწმუნებული ვარ რომ გამამართლებელ გადაწყვეტილებას მიიღებენ, ჩვენ უბრალოდ გვინდა რომ ცოცხალი შეხვდეს ამ გადაწყვეტილებას“,-განაცხადა მიხეილ რამიშვილმა.
2017 წლის 5 სექტემბერს, მოსამართლე ბესიკ ბუგიანაშვილმა დეკანოზ გიორგი მამალაძეს 9 წლით თავისუფლების აღკვეთა მიუსაჯა. განაჩენი ორივე მხარემ გაასაჩივრა.
სააპელაციო სასამართლომ ძალაში საქალაქო სასამართლოს გადაწყვეტილება დატოვა.
უზენაესმა სასამართლომ კი საქმე წარმოებაში საერთოდ არ მიიღო.
გიორგი მამალაძე მკვლელობის მომზადების ბრალდებით თბილისის აეროპორტში 2017 წლის 10 თებერვალს დააკავეს. ის ბერლინში მიფრინავდა, სადაც საქართველოს პატრიარქს ოპერაციისთვის ამზადებდნენ.