არსად ისე არ იგრძნობა ქართული სული, როგორც აქ აჭარში, ქართული ცნობიერება ვერასოდეს ვერავინ შეარყია, როცა საქართველოს უჭირდა, აჭარლები ქრისტიანები, მუსლიმანები ყველანი ერთად იდგნენ ჩვენი სამშობლოს, მიწა-წყლის ერთიანობის სადარაჯოზე. დიდი მადლობა ამისთვის თქვენ, ჩვენ ყველანი ქედს ვიხრით თქვენი პატრიოტიზმის წინაშე, – ასე მიმართა საქართველოს პრემიერ-მინისტრმა, პარტია „ქართული ოცნების“ თავმჯდომარემ, გიორგი კვირიკაშვილმა ბათუმში, დეპუტატობის კანდიდატების წარდგენაზე შეკრებულო მოქალაქეებს.
„ასეა დღესაც, მეგობრებო, დღესაც გვაქვს გამოწვევები, დღეს გვაქვს გამოწვევა, გავაერთიანოთ ჩვენი ქვეყანა, ჩვენი ქვეყნის ერთიანობა მშვიდობიანად ვუზრუნველყოთ და ამისთვის უნდა ავაშენოთ თანამედროვე სახელმწიფო. ამიტომ აქაც თქვენი იმედი გვაქვს“,-აღნიშნა გიორგი კვირიკაშილმა.
მისივე თქმით, „ოთხი წლის წინ ყველამ, ერთად ბიძინა ივანიშვილის ხელმძღვანელობით მოვახდინეთ ძირეული გარდატეხა ჩვენი ქვეყნის განვითარებაში“.
„ჩვენ ავირჩიეთ სრულიად ახალებური მოდელი, მოდელი, რომელიც არ უგულებელყოფს ადამიანის უფლებას, რომელიც თითოეული ადამიანის თავისუფლებას, მის ძირეულ უფლებებს სცემს პატივს. ჩვენი განვითტარების პროგრამის ქვაკუთხედი გახლავთ თითოეული ადამიანის ძირეული უფლებები და მისი პატივისცემა. ჩვენ არ გვჭირდება სახელმწიფო, რომელიც არარად აგდებს ადამიანს, მის ღირსებას. არც ერთი ხიდი, ესტაკადა, გზა, კოშკი არ ღირს არც ერთი დაჩაგრული ადამიანის, მისი შვილის, მეუღლის ,მამის დედის, ბებიის თუ ბაბუის დაღვრილ ცრემლად. ჩვენ გვინდა სახელმწიფო, რომელიც კიდევ უფრო სწრაფად განვითარდება, მაგრამ არ გადაივლის საკუთარ მოქალაქეებზე. სწორედ ასეთ სახელმწიფოს ვაშენებთ ჩვენ ყველანი ერთად. სწორედ ამისთვის, გასული 4 წლის განმავლობაში ჩვენ მივაქციეთ ყურადღება ისეთ სასიცოცხლოდ მნიშვნელოვან მიმართულებებს. როგორიც არის ჯანმრთელობის დაცვა და ჯანდაცვის უზრუნველყოფა“,- განაცხადა პრემიერ-მინისტრმა და C ჰეპატიტის პროგრამის მნიშვნელოვან შედეგებს გაუსხვა ხაზი.
პრემიერ-მინისტრის თქმით, უმნიშვნელოვანესია, რომ დღეს საქართველოს მოქალაქეებს აღარ ჭირდებათ უკანასკნელი გროშების გაღება, საკუთარი ბინების დაგირავება, რათა საკუთარი შვილის, დედის, მამის ჯანმრთელობა უზრუნველყონ.
„დამეთანხმებით, რომ ეს არის უდიდესი მიღწევა“,-აღნიშნა გიორგი კვირიკაშვილმა.