პარლამენტის თავმჯდომარემ არჩილ თალაკვაძემ 10 მნიშვნელოვანი საკითხი წარადგინა, რომელზეც პარლამენტი საშემოდგომო სესიაზე იმუშავებს. როგორც არჩილ თალაკვაძემ განაცხადა, ყველა საკითხი ძალიან მნიშვნელოვანია. პარლამენტის თავმჯდომარის თქმით, პირველი და უმნიშვნელოვანესი საკითხი არის საარჩევნო რეფორმა, რომლითაც ქვეყანაში 2020 წელს არჩევნების პროპორციული სისტემით ჩატარდება.
„ერთ-ერთი მნიშვნელოვანი გამოწვევაა ჩვენი ქვეყნისთვის ტერიტორიული მთლიანობა და ანტისაოკუპაციო პოლიტიკა. ჩვენი საზოგადოება ხედავს, თუ რამდენი დისკუსიაა, როგორი პოლიტიკური დებატებია ამ საკითხთან დაკავშირებით პარლამენტში. გვინდა, ამ თვალსაზრისით ძალიან პრაქტიკული გადაწყვეტილებები მივიღოთ. მაგალითად, ასეთი არის საოკუპაციო ხაზთან განლაგებული სოფლების მხარდაჭერა. განვიხილავთ საკანონმდებლო ცვლილებებს, სადაც მათ ექნებათ კიდევ უფრო განსაკუთრებული სტატუსი და დაფინანსება, ეს სოფლები შეძლებენ, მიიღონ უფრო მეტი მხარდაჭერა ხელისუფლების და სახელმწიფოს მხრიდან რადგან ადამიანები, ვინც იქ ცხოვრობენ, ძალიან მნიშვნელოვან მხარდაჭერას საჭიროებენ. ჩვენ უნდა ვაჩვენოთ, რომ არა მხოლოდ პოლიტიკური დებატებით, არამედ ბიუჯეტითა და საკანონმდებლო თვალსაზრისით ეს მიმართულებები არის გამაგრებული ბოლომდე“, – განაცხადა არჩილ თალაკვაძემ.
ამასთან, როგორც პარლამენტის თავმჯდომარემ აღნიშნა, მმართველი გუნდი მხარს უჭერს პასუხისმგებლიან პოლიტიკას დეოკუპაციასთან და ტერიტორიულ მთლიანობასთან დაკავშირებით.
„რა თქმა უნდა, მხარს ვუჭერთ ჩვენს პასუხისმგებლიან პოლიტიკას დეოკუპაციასთან და ტერიტორიულ მთლიანობასთან დაკავშირებით, ჩვენ არ გვაქვს უფლება, რამე ემოციური გადაწყვეტილებებით კითხვის ნიშნის ქვეშ დავაყენოთ ჩვენი მშვიდობა, უსაფრთხოება და მომავალი. ამიტომ გზა, რომელიც დავისახეთ, ეს არის პრაგმატული პოლიტიკა, ეს არის პასუხისმგებლიანი პოლიტიკა და, ბუნებრივია, სხვა ალტერნატივა მშვიდობიანი განვითარების, ჩვენი ინსტიტუტების გაძლიერების, ტერიტორიული მთლიანობის აღსადგენად არ გვესახება. ამაში ჩვენ საზოგადოების მაქსიმალურ მხარდაჭერას ველით მომავალშიც“,-აღნიშნა არჩილ თალაკვაძემ.