„ამდენ ხნიანი ლოდინის, ტანჯვის, ტკივილის, მეტროში თვალის ამოვარდნების, უამრავი მზერის შემდეგ მაინც გავიმარჯვე. 5 თვის შემდეგ, მაგრამ მაინც“ – ასეთია მაკო გომურის რეაქცია პროკურატურის მიერ მის დაზარალებულად ცნობასთან დაკავშირებით.
„ამით არ მთავრდება ყველაფერი, პირიქით იწყება“ – აღნიშნავს მაკო გომური და აქვე კითხვას სვამს, თუ რატომ არ ცნეს დაზარალებულად 20 ივნისის აქციაზე დაშავებული გიორგი სულაშვილი, რომელსაც მისი თქმით, სახე მასზე მეტად ჰქონდა ტრავმირებული.
11 ნოემბერს მთავრმა პროკურატურამ მაკო გომურთან ერთად, 20-21 ივნისს განვითარებულ მოვლენებთან დაკავშირებით, დაზარალებულად ომარ სეხნიაშვილი და მირზა ლიპარტელიანიც ცნო.
საგამოძიებო ორგანოში განმარტავენ რომ გადაწყვეტილება მიღებულია სასამართლო-სამედიცინო ექსპერტიზის დასკვნებისა და შესაძლო დანაშაულებრივ ეპიზოდებზე დამატებითი საგამოძიებო მოქმედებების შემდეგ.