შინაგან საქმეთა სამინისტრო ქალთა მიმართ ძალადობის წინააღმდეგ 16-დღიან სამთავრობო კამპანიას შეუერთდა.
კამპანიის ფარგლებში, შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტის ადამიანის უფლებათა დაცვის სამმართველოს წარმომადგენელმა ბელა ფიფიამ ამერიკის შეერთებული შტატების საელჩოს ეგიდით ჩატარებულ ტრენინგში მიიღო მონაწილეობა.
სწავლების მიზანია ისეთი გლობალური მასშტაბის ქმედებების დაგეგმვა, რომლებიც აამაღლებს საზოგადოების ცნობიერებას და მოუწოდებს მათ, მიიღონ ზომები ქალებისა და გოგონების წინააღმდეგ ძალადობის აღმოფხვრისა და პრევენციისთვის.
შინაგან საქმეთა სამინისტროს წარმომადგენელმა ოჯახში და ოჯახური ნიშნით ჩადენილ დანაშაულებზე, ქალთა მიმართ ძალადობის და სექსუალური შევიწროების საკითხებთან დაკავშირებული დანაშაულების პრევენციის მიზნით განხორციელებულ ღონისძიებებზე, ასეთ ფაქტებზე ხარისხიანი გამოძიების უზრუნველყოფის მექანიზმებსა და ამ მიმართულებით, სამინისტროს მიერ მიღწეულ შედეგებზე ისაუბრა.
შეხვედრას ესწრებოდნენ შინაგან საქმეთა სამინისტროს მართლწესრიგის ოფიცრები, საპატრულო პოლიციისა და კრიმინალური პოლიციის თანამშრომლები.