ე.წ. ციანიდის საქმეზე მსჯავრდებული დეკანოზის, გიორგი მამალაძის ჯანმრთელობის მდგომარეობის შესახებ მეუფე პეტრე ცაავა საუბრობს. ჭყონდიდის ეპარქიის ყოფილი მიტროპოლიტის შეფასებით, ხელისუფლება საპატრიარქოსთან კონფლიქტში შესვლას ერიდება.
მისივე თქმით, დეკანოზ მამალაძის მძიმე ჯანმრთელობის მდგომარეობის გათვალისწინებით, ყველა პირობა არსებობს იმისათვის, რომ კანონში ჩადებული მუხლი ამოქმედდეს და პატიმრობა გადავადდეს.
“სასამართლოს დამოუკიდებლობაზე თავს ვერ მოვიტყუებ, მაგრამ მე ვიცი, რომ ხელისუფლებას პირადად აქვს სურვილი, უბრალოდ ისინი არ უპირისპირდებიან საპატრიარქოს და კონფლიქტში არ შედიან, ვინაიდან, საარჩევნო წელიწადია. მხოლოდ ეს არის მიზეზი. ჩემი ღრმა რწმენით, ამ შემთხვევაში, სასამართლოსაც და იუსტიციის სამინისტროსაც და კერძოდ მინისტრს, აქვს საშუალება ღვთისაგან, რომ მათ თავიანთი ჩადენილი ცოდვა მამალაძის საქმესთან მიმართებაში და დანაშაული, ნაწილობრივ მაინც გამოისყიდონ. დიაგნოზის საფუძველზე და იმ არსებული რეალობის საფუძველზე, რომ 10 თვეზე მეტია ადამიანი პარალიზებულია, მწოლიარე მდგომარეობაშია, სარეცელს მიჯაჭვულია, რა თქმა უნდა, ყველა წინაპირობა არსებობს იმისათვის, რომ კანონში გათვალისწინებული არსებული ეს მუხლი, დეკანოზ მამალაძის და სხვა მსგავსი პატიმრები თუ არსებობს საქართველოს პენიტენციალურ სისტემაში, ყველას მიმართ იქნეს გამოყენებული”, – განაცხადა მეუფე პეტრე ცაავამ.