წინა წელთან შერდარებით, 2019 წელს საქართველოში, ავტოსაგზაო შემთხვევების შედეგად გარდაცვალების შემთხვევები 5%-ით არის გაზრდილი. 2019 წლის განმავლობაში სულ 5 839 ავტოსაგზაო შემთხვევა დაფიქსირდა, რა დროსაც 481 ადამიანი დაიღუპა და 7921 დაშავდა. ინფორმაციას ამის შესახებ შინაგან საქმეთა სამინისტროზე დაყრდნობით ორგანიზაცია „საქართველოს ალიანსი უსფრთხო გზებისთვის“ ავრცელებს.
9,5% გაზრდილია ასევე საგზაო შემთხვევების რიცხვიც. რაც შეეხება დაშავებულთა რაოდენობას, სტატისტიკის მიხედვით, ის 12 %-ით შემცირებული იყო.
დედაქალაქში ავტოსაგზაო შემთხვევების შედეგად 2019 წელს 10%-ით მეტი ადამიანი გარდაიცვალა, ვიდრე წინა წელს. ავტოსაგზაო შემთხვევები 8%-ით არის გაზრდილი, დაშავებულობა კი 11%-ით შემცირდა. გასულ წელს თბილისში, ჯამში სულ 2891 ავარია მოხდა, დაიღუპა 100 და დაშავდა 3430 ადამიანი.
შსს-ს ინფორმაციაზე დაყრდნობით, ორგანიზაცია „საქართველოს ალიანსი უსფრთხო გზებისთვის“ აცხადებს, რომ 2019 წელს საპატრულო პოლიციის სამოქმედო ტერიტორიაზე 16 წლამდე 19 მოზარდი დაიღუპა, საიდანაც 16 მგზავრი იყო, 3 – ქვეითად მოსიარულე, ხოლო დაშავდა 853 ადამიანი. რაც შეეხება წინა წლების სტატისტიკას, 2018 წელს 21 მოზარდი დაიღუპა და 1012 დაშავდა, 2017 წელს 23 დაიღუპა და 955 დაშავდა.
ორგანიზაციის განმარტებით, საგზაო-სატრანსპორტო შემთხვევების გამომწვევ სავარაუდო მიზეზებს შორის სახელდება შემხვედრი მოძრაობის ზოლში გადასვლა ან გასწრების წესების დარღვევა, მოძრაობის დადგენილი სიჩქარის გადაჭარბება, სატრანსპორტო საშუალების მართვა ალკოჰოლური სიმთვრალის მდგომარეობაში და ა.შ.