საერთაშორისო თანამეგობრობაში საქართველოს მიმართ დიდი ნდობა და ოპტიმიზმი არსებობს, – ამის შესახებ პარლამენტის თავმჯდომარე არჩილ თალაკვაძემ „შაბათის ქრონიკაში“ განაცხადა. მან მმართველი გუნდის ვაშინგტონსა და სტრასბურგში ვიზიტები შეაჯამა და დიალოგის შედეგებზე ისაუბრა.
„ორივე შეხვედრების შედეგებს თუ გავაანალიზებთ, მე შემიძლია გითხრათ სრული პასუხისმგებლობით და ჩვენს მოქალაქეებს ვუთხრა, რომ საქართველოს აქვს ძლიერი საერთაშორისო მხარდაჭერა, ჩვენ ვინარჩუნებთ ნდობას და საქართველოს მიმართ არსებობს დიდი ოპტიმიზმი, რომ ჩვენ ვაგრძელებთ დემოკრატიის გაძლიერებას, ეკონომიკის გაძლიერებას და ქვეყნის ინტეგრაციას ევროატლანტიკურ სტრუქტურებში“, – განაცხადა თალაკვაძემ.
მისივე თქმით, პარტნიორები საქართველოს პროგრესს აღიარებენ, მათი მხრიდან კრიტიკულ შენიშვნებს კი პირდაპირი კომუნიკაცია სჭირდება.
„ამერიკა როგორც სახელმწიფო და ევროპარლამენტი, როგორც საერთაშორისო სტრუქტურა, საქართველოს კვლავაც უჭერს მხარს და კვლავაც არის იმ პოზიციაზე, რომ ჩვენ ამ წლების განმავლობაში მივაღწიეთ დიდ პროგრესს ინსტიტუციების გაძლიერების, დემოკრატიის გაძლიერების, ეკონომიკის, თავდაცვისა და უსაფრთხოების სფეროში. ეს შეფასებები და რაც ჩვენ ვნახეთ კრიტიკული პოზიციები, რაც ჩვენ ვნახეთ კითხვები ჩვენი მეგობრებისგან, ეს არის პოლიტიკური განზომილება. ერთ შემთხვევაში კონგრესი, მეორე შემთხვევაში ევროპარლამენტი. ამიტომ ჩვენგან ეს მიღებულია როგორც მეგობრების პოზიცია, რომელსაც ცალსახად სჭირდებოდა და სჭირდება პირდაპირი კომუნიკაცია, გაცვლა არგუმენტების. სადაც არის საფუძვლიანი კითხვები და რეკომენდაციები – ამის გათვალისწინება“, – აღნიშნა პარლამენტის თავმჯდომარემ.
არჩილ თალაკვაძემ ასევე ხაზი გაუსვა იმას, რომ მმართველი გუნდის წევრების ვიზიტები აშშ-ში მალე მოიტანს შედეგებს.
„მე გარწმუნებთ, ძალიან ცოტა დაგვჭირდება ლოდინი, როდესაც ნახავთ, რომ ეს რიტორიკა, რაც იყო წინა თვეების განმავლობაში და ასევე დისკუსია, რომელსაც დღეს ვხედავთ ჩვენ, აუცილებლად დასრულდება ძალიან პოზიტიურად“, – განაცხადა თალაკვაძემ.