“მარნეულისა და ბოლნისის მუნიციპალიტეტებში საქართველოში წარმოებული 10 000 პირბადე გუშინ გაიგზავნა და დღის ბოლომდე 50 000-მდე პირბადე კიდევ გაიგზავნება და დაურიგდება იქ მომუშავე ადამიანებს”, – ამის შესახებ საქართველოს ეკონომიკისა და მდგრადი განვითარების მინისტრმა, ნათია თურნავამ საკოორდინაციო საბჭოს დასრულების შემდეგ გამართულ ბრიფინგზე განაცხადა.
მისივე თქმით, პირბადის საწარმოებლად საჭირო ნედლეულის მიწოდება დოზირებულია.
„ეს ისეთი წარმოებაა, რომელიც აქამდე არ გაგვაჩნდა, რადგან არ იყო საჭიროება, ამიტომ, ვიდრე წარმოება მასობრივად არ აეწყობა, რაოდენობა შეზღუდულია. ათამდე სამკერვალო საწარმო პროცესში ეტაპობრივად ერთვება, რამაც საშუალება მოგვცა, გაგვეზარდა კერვის მასშტაბი და ტემპი. თავიდან თუ იყო 20 000 პირბადე, დღეს ჩვენ ვსაუბრობთ, რომ შეიძლება დღე-ღამეში 70 000 პირბადემდე ავიდეთ. მაგრამ უნდა გვესმოდეს, რომ ნედლეულის მოწოდების საკითხი საფრთხილო და სერიოზულად სამუშაოა. მარნეულისა და ბოლნისის მუნიციპალიტეტებში საქართველოში წარმოებული 10 000 პირბადე გუშინ გაიგზავნა და დღის ბოლომდე 50 000-მდე პირბადე კიდევ გაიგზავნება და დაურიგდება იქ მომუშავე ადამიანებს. კარგია ის, რომ ჩვენ უკვე დავამყარეთ გრძელვადიანი საკონტრაქტო კავშირები საწარმოსთან საქართველოს ფარგლებს გარეთ, რომელიც ნედლეულს მოგვაწვდის. ამის საფუძველზე გავზრდით პირბადეების ყოველდღიურ წარმოებას. რა თქმა უნდა, ვისურვებდი, რომ ნედლეულის უწყვეტი მიწოდების პირობაში ჩვენ უკვე გაყიდვაშიც მივცეთ ეს პირბადეები, მაგრამ, ჯერჯერობით, პირბადის საწარმოებლად საჭირო ნედლეულის მიწოდება დოზირებულია“, -განაცხადა მინისტრმა.