ოპოზიციური პარტიების ერთიან წერილთან დაკავშირებით შეფასება გააკეთა კახა კალაძემ. დედაქალაქის მერი ამბობს, რომ ახლა ყველაზე მნიშვნელოვანი ერთად დგომაა, მიუხედავად იმისა, ვინ რომელ პოლიტიკურ ჯგუფს განეკუთვნება.
“ქართული ოცნების” გენერალური მდივანი ოპოზიციის წევრების განცხადებას მიესალმება.
“ვხედავთ რა მდგომარეობაა ქვეყანაში, მსოფლიოს სხვადასხვა ქვეყნებში. მნიშვნელოვანია ჩვენი ყველას ერთად დგომა, მიუხედავად ჩვენი პოლიტიკური კუთვნილებისა, გარკვეული სხვადასხვა პოლიტიკური შეხედულებებისა. მე ვფიქრობ, დღეს არის ის დრო, სადაც ყველა უნდა გავერთიანდეთ და ვებრძოლოთ მტერს, რომელსაც ჰქვია კორონავირუსი. ასე, რომ მისასალმებელია ეს განცხადება. ჩვენ, რა თქმა უნდა, ვმუშაობთ ამ მიმართულებით, ფინანსთა სამინისტროს უკვე კონკრეტული ნაბიჯები აქვს გადადგმული,” – განაცხადა კახა კალაძემ.
23 პოლიტიკური პარტია და სამოქალაქო მოძრაობა საერთაშორისო საზოგადოებას ღია წერილით მიმართავს, რომელშიც ნათქვამია, რომ საქართველოს მთავრობის წინაშე დგას საერთაშორისო ფინანსური მხარდაჭერის მოპოვების გადაუდებელი აუცილებლობა და აღნიშნული პარტიები, როგორი კრიტიკულებიც არ უნდა იყონ ხელისუფლების მიმართ, ამ მცდელობაში სრულ მხარდაჭერას უცხადებენ.