„გირჩის“ ლიდერი, ზურაბ ჯაფარიძე აცხადებს, რომ პარტია საპარლამენტო არჩევნებში მხოლოდ პარტიული სიით მიიღებს მონაწილეობას. მისი თქმით, შემოდგომაზე ხელისუფლების ცვლილებისთვის მაჟორიტარულ ოლქებში ერთიან ოპოზიციურ კანდიდატებზე შეთანხმება არის მნიშვნელოვანი განსაკუთრებით კი, თბილისში.
“გირჩიდან“ მე განვიხილებოდი როგორც შესაძლო მაჟორიტარობის კანდიდატი ვაკეში. უარს ვამბობ ამ შესაძლებლობაზე, რაც ნიშნავს, რომ „გირჩი“ წლევანდელ საპარლამენტო არჩევნებში მონაწილეობას მიიღებს მხოლოდ პარტიული სიით. ლოგიკურად, შეთანხმება საერთო კანდიდატებზე თბილისის დარჩენილ ექვს ოლქში, ახლა უფრო მარტივი იქნება. რაც შეეხება ერთიანი ოპოზიციური კანდიდატების ან მეორე ტურში გასული (იქ, სადაც ერთიან კანდიდატზე შეჯერება ვერ მოხდება) კანდიდატების მხარდაჭერას სხვა ოპოზიციური პარტიების მხრიდან: წამგებიანი ილუზიის შექმნაა იმის მტკიცება, რომ ოპოზიციური პარტიების მხარდამჭერების ხმები უბრალოდ დაჯამდება, თუ სხვადასხვა პარტიების ლიდერები საკუთარ ამომრჩეველს მოუწოდებენ ოპოზიციური კანდიდატის მხარდაჭერისკენ. სინამდვილეში მნიშვნელოვანია, რომ მაჟორიტარულ ოლქებში კანდიდატებად ისეთი ადამიანები დასახელდნენ, ვისაც მეტი შანსი აქვს, მიიღოს სხვადასხვა ტიპის ოპოზიციურად განწყობილი ელექტორატის ხმები.
არსებობენ კანდიდატები, რომლებსაც „გირჩის“ ამომრჩეველი არც ერთ შემთხვევაში არ დაუჭერს მხარს, ასეთია მაგალითად, „ნაციონალური მოძრაობიდან“ გრიგოლ ვაშაძე, რომელსაც იმდენი სისულელე და შეურაცხმყოფელი რაღაცები აქვს ნათქვამი კონკრეტულად „გირჩის“ ამომრჩეველთან მიმართებაში, რომ ისინი მას უბრალოდ მხარს არ დაუჭერენ. ასეთი ხალხი არსებობს, მაგრამ კიდევ ერთხელ ვამბობ, ყველა პარტიაში არსებობენ ადამიანები, რომლებსაც ასეთი ნეგატივი არ აქვთ. თუ ისინი პირველ რიგში დაადასტურებენ, რომ დაუჭერენ მხარს იმ ხედვებს და იდეებს, რომლისთვისაც „გირჩი“ იბრძვის, მაშინ მათ აქვთ შანსი, მოიპოვონ „გირჩის“ ამომრჩევლების მხარდაჭერა“, – განაცხადა ზურაბ ჯაფარიძემ.