საფრანგეთის აღმოსავლეთში საბაჟო სამსახურმა დააკავა დამკრძალავი ბიუროს მანქანა, რომლითაც ნარკომოვაჭრეებს 70 კილოგრამზე მეტი მარიხუანა გადაჰქონდათ. ამის შესახებ Est Republicain-ი წერს.
სარიტუალო მანქანა მებაჟეებმა ქალაქ ბეზანსონის ავტოსადგომზე შენიშნეს. ეჭვი მანქანის მძღოლის ქცევამ გამოიწვია.
მანქანის დათვალიერების შედეგად, გაირკვა, რომ არ ჰქონდა გაგრილების სისტემა. სალონში 4 კუბო იდო, უცნაური კლიტეებით და სახელურებით.
კუბოების გახსნის შემდეგ, იქ 71 კილოგრამი მარიხუანა აღმოჩნდა. ნარკოტიკი სპეციალურ პაკეტებში იყო მოთავსებული. შეფასების შედეგად ტვირთის ღირებულება დადგინდა. ნარკომოვაჭრეებს 700 000 ევროს ღირებულების მარიხუანა გადაჰქონდათ.
France-Presse-ს ინფორმაციით, ტვირთი საფრანგეთში ესპანეთიდან მოხვდა. კატაფალკის მძღოლი რუმინეთის მოქალაქეა. მალე ის სასამართლოს წინაშე წარდგება.