ურეკის პოლიციის ყოფილი უფროსის უკანონოდ დაკავების საქმეზე ორმა ბრალდებულმა – დავით ქოქიაშვილმა და ილია გამგებელმა წარდგენილი ბრალი აღიარეს. სასაამართლო პროცესზე ქოქიაშვილმა გაიხსენა, რომ საქმეში დაზარალებულის სტატუსით მყოფი პირის, ჯემალ შამათავას დაკავება ნამდვილად იგეგმებოდა.
რაც შეეხება მეორე ბრალდებულს, ილია გამგებელმა დანაშაული სრულად აღიარა და დაადასტურა, რომ ლევან ქარდავასგან, ტელეფონით შამათავას დაკავების დავალება მიიღო.
გამოძიების ინფორმაციით, ჯემალ შამათავას 2006 წელს დაუკავშირდნენ კუდის ყოფილი მაღალჩინოსნები და აცნობეს, რომ ურეკში მდებარე ბადრი პატარკაციშვილის სახლიდან მოეხსნა დაცვა, რადგან გაფრთხილების სახით უნდა მომხდარიყო გასროლა, რაც ბადრი პატარკაციშვილს პოლიტიკურ საქმიანობაც შეაწყვეტინებდა. ჯემალ შამათავამ კი ამის შესახებ პატარკაციშვილის დაცვას აცნობა.