მესმის, რომ დიდი ხანია ერთმანეთი არ გვინახავს, მაგრამ გთხოვთ, რომ ეს სხდომა პატივისცემით განვაგრძოთ“, – ამ სიტყვებით პარლამენტის თავმჯდომარე არჩილ თალაკვაძემ ბიუროს სხდომაზე დეპუტატებს მიმართა. სხდომაზე კამათი „ევროპული საქართველოს“ წევრის, სერგი კაპანაძის განცხადებამ გამოიწვია, რომელმაც მმართველ გუნდს შეახსენა, რომ გასულ წელს სრულად პროპორციულ სისტემაზე გადასვლას საკანონმდებლო ორგანომ მხარი არ დაუჭირა.
„კოლეგებო, მოდით, მშვიდად გავაგრძელოთ სამუშაო პროცესი. მესმის, რომ დიდი ხანია ერთმანეთი არ გვინახავს, მაგრამ გთხოვთ, რომ ეს სხდომა პატივისცემით განვაგრძოთ და კონსტრუქციულ რეჟიმში ვიმუშაოთ. ოპოზიციას აქვს უფლება, ჰქონდეს თავისი მოსაზრება და თავისებურად განმარტოს ფაქტები, მაგრამ სიმართლე არის ის, რომ „ქართულმა ოცნებამ“ 2018 წელს, საკონსტიტუციო რეფორმისას, მიიღო გადაწყვეტილება პროპორციულ საარჩევნო სისტემასთან დაკავშირებით. ეს უკვე ისტორიაა. რაც შეეხება საარჩევნო კოდექსსა და 2020 წლისთვის საარჩევნო სისტემის შეცვლას, ეს კიდევ ერთი პროგრესული ნაბიჯი იყო, რითაც ჩვენ, როგორც ქვეყანამ და ხელისუფლებამ დავამტკიცეთ, რომ საქართველო აძლიერებს თავის დემოკრატიას. ეს არის მოცემულობა, რომელიც საქართველოს პარლამენტმა კენჭისყრით დაადასტურა,“ – განაცხადა თალაკვაძემ.