„ბიბისის“ ცნობით, სლოვაკეთიდან რუსი დიპლომატების გაძევება ბერლინში ზელიმხან ხანგოშვილის მკვლელობას უკავშირდება. როგორც სლოვაკეთის საგარეო საქმეთა სამინისტროში განაცხადეს, გაძევებულ დიპლომატებს ვენის კონვენციის დარღვევაში და სლოვაკეთის ვიზების ბოროტად გამოყენებაში სდებენ ბრალს.
„საუბარია სანქტ-პეტერბურგში სლოვაკეთის საკონსულოს მიერ გაცემული ვიზის ბოროტად გამოყენებაზე. ამასთან დაკავშირებით სერიოზული დანაშაული ჩაიდინეს ევროკავშირისა და ნატო-ს სხვა წევრი ქვეყნის ტერიტორიაზე“, – განაცხადეს სლოვაკეთის საგარეო უწყებაში.
საგამოძიებო პორტალ „ბელიგქათის“ მონაცემებით, ხანგოშვილის მკვლელობის ერთ-ერთი ორგანიზატორი ევროკავშირში სლოვაკეთის ვიზით გაემგზავრა.
საქართველოს მოქალაქე ზელიმხან ხანგოშვილი 2019 წლის აგვისტოში ბერლინში მოკლეს. გერმანიის პროკურატურამ მკვლელობის შეკვეთასა და ორგანიზებაში რუსეთი დაადანაშაულა.