ინფექციურ საავადმყოფოში კორონავირუსით ინფიცირებული სამი პაციენტის მდგომარეობა კვლავ მძიმეა, – ამის შესახებ ჟურნალისტებს ინფექციური საავადმყოფოს სამედიცინო დირექტორმა, მარინა ეზუგბაიამ განუცხადა.
მისივე თქმით, დღეისთვის ინფექციურ საავადმყოფოში კორონავირუსზე 32 პაციენტი მკურნალობს.
„მათგან სამი პაციენტის მდგომარეობა კვლავ მძიმეა, თუმცა არცერთ მათგანთან დაავადების პროგრესირრება გაუარესება არ შეინიშნება და სავარაუდოდ, მალე გაუმჯობესდება. დანარჩენი პაციენტების მდგომარეობა საშუალო და მსუბუქი ფორმისაა“, – განაცხადა ეზუგბაიამ.
საქართველოში კორონავირუსის კიდევ 5 ახალი შემთხვევა გამოვლინდა, გამოჯანმრთელდა 10 ადამიანი.
ამ დროისთვის საქართველოში კორონავირუსის 1 283 შემთხვევაა დადასტურებული. განკურნებულთა რაოდენობა სულ 1 068-ს შეადგენს. უცხოეთიდან სამკურნალოდ გადმოყვანილია საქართველოს 41 მოქალაქე. კორონავირუსის შედეგად, ქვეყანაში 17 პაციენტი გარდაიცვალა.