ზუგდიდში, „საქართველოს ბანკის“ ფილიალზე განხორციელებულ თავდასხმასთან დაკავშირებით, პარტია „ქართული ოცნების“ გენერალური მდივანი, კახა კალაძე პოლიტიკოსებს პოლიტიკური განცხადებებისგან თავის შეკავებისკენ მოუწოდებს.
მისივე თქმით, ადამიანების სიცოცხლის უსაფრთხოება ყველაზე მთავარი და მნიშვნელოვანი პრიორიტეტია.
„ძალიან მძიმე თემა იყო ის, რაც მოხდა. თუმცა ყველაზე მთავარია, რომ მძევლები სახლში დაბრუნდნენ და თმა არავის ჩამოვარდნია. ადამიანების სიცოცხლის უსაფრთხოება ყველაზე მთავარი და მნიშვნელოვანი პრიორიტეტია. რაც შეეხება დაკავებას, მიმდინარეობს ღონისძიებები, იდენტიფიცირებულია ადამიანი, ვინც ეს დანაშაული ჩაიდინა. კიდევ ერთხელ მინდა ვთხოვო პოლიტიკოსებს, მაქსიმალურად თავი შევიკავოთ პოლიტიკური განცხადებებისგან, ამ თემასთან დაკავშირებით შეფასებებისგან. მივცეთ შესაძლებლობა შესაბამის უწყებებს, რომ რაც შეიძლება დროზე დააკავონ დამნაშავე“, – განაცხადა კალაძემ.