სოციალურ ქსელებში გავრცელებულ ბიულეტენებზე, რომელიც წინა საპრეზიდენტო არჩევნების მონაცემს ასახავს, ცესკოში განმარტება გაკეთდა.
ცენტრალური საარჩევნო კომისიის პრესსპიკერმა ნათია იოსელიანმა განაცხადა, რომ ეს იყო წინა საპრეზიდენტო არჩევნების დროს გამოყენებული ბიულეტენები.
„ჩვენც ვნახეთ აღნიშნული ბიულეტენები, რომელიც არის წინა საპრეზიდენტო არჩევნების. ის ასევე გავრცელდა სოციალური ქსელებით. ფაქტი არის ერთი – დაუდგენელი ნიმუშის ბიულეტენებია. ისინი სავარაუდოდ გამოყენებული აქვს ამომრჩეველს, რომელსაც როგორც ჩანს, ეს ბიულეტენები ჰქონდა და სწორედ იმისათვის, რომ საარჩევნო პროცესის დისკრედიტაცია მოეხდინა, ეს ბიულეტენები გამოიყენა.
მას ჩათვლიდან დაუდგენელი ნიმუშის ბიულეტენად, ის თვლაში არ მონაწილეობა და დისბალანსს ვერ გამოიწვევდა“, – აღნიშნა ნათია იოსელიანმა.
მისივე თქმით, ეს იყო სავარაუდოდ ამომრჩევლის მხრიდან არაკეთილსინდისიერი საქციელი.
„ეს არის კანონით დასჯადი ქმედება, ბიულეტენები არის სახელმწიფო საკუთრება, მისი განზრახ დაზიანება სისხლის სამართლის დანაშაულია“, – განაცხადა ნათია იოსელიანმა.