რიცხვები, რომელიც კორონავირუსით დაავადებულთა და გარდაცვლილთა შესახებ ყოველდღე ქვეყნდება, საქართველოსნაირი პატარა ქვეყნისთვის შემაძრწუნებელია, – ამის შესახებ ინფექციური საავადმყოფოს მიმღები განყოფილების უფროსმა, მაია ზალდასტანიშვილმა „რუსთავი 2“-ის ეთერში განაცხადა.
მისი თქმით, რაც მეტი იქნება დაავადებულთა რაოდენობა, მეტი იქნება გარდაცვალების შემთხვევა.
„ფაქტია, რომ კლინიკები გადაჭედილია და პაციენტებს ვეღარ ვიღებთ, რომლებსაც რეალურად სჭირდებათ დახმარება და ჰოსპიტალიზაცია. ასევე ძალიან გაუჭირდათ ამჟამად ოჯახის ექიმებსაც. ფაქტობრივად, ისინიც ვეღარ ახერხებენ მართვას და 112-იც სრულად არის დაკავებული. სიტუაცია ძალიან რთულია. ის, რომ შეზღუდვების გამკაცრება აუცილებელია, ამაში ორი აზრი არ არსებობს. მესმის, რომ რთული ეკონომიკური მდგომარეობაა, უამრავმა ადამიანმა დაკარგა სამსახური და შეზღუდვების დაწესება კიდევ უფრო გაართულებს სიტუაციას, მაგრამ სიცოცხლე უპირველესია“, – განაცხადა მაია ზალდასტანიშვილმა.